Portmen, aduana mag-ilog sa no. 1 spot sa CVBA

CEBU, Philippines – Hinugtanay sa bakus ang mapaabot tali sa Portmen ug Aduana gumikan kay ila man ilogan ang no. 1 spot sa labing unang torneyo sa  Cebu Vintage Basketball Association (CVBA) karong adlawa diha sa San Nicolas gym sa Tupas, Dakbayan sa Sugbo.

Sa kasamtangan, ang Portmen mao ang nagkupot sa liderato bitbit ang 5-1 nga baraha, samtang ang Aduana adunay 4-1 record. Kun ugaling modaog ang Aduana, sila na magtungkawo sa unang dapit ug ang Portmen mokanaog sa ikaduhang dapit.

Aron makuha nila ang liderato, ang Aduana kinahanglan nga mopakita gihapon og maayong salida ug itugyan ang pagsalig niini ngadto nilang Baeng  Medalle,  Ronan Cañete ug Dodong Belarmino.

Dili hinuon angayan nga mokompiyansa ang Aduana kay gawas nga haring gangis ilang sangkaon, ang Portmen aduna sa'y kasaligan nga mga magduduwa sama nila ni Bong Tan, Jim Villa ug Boddie Monteño.

Sa laing bahin, ang BOC Hitz mosuway og bangon human mahisukamod sa katapusan nilang duwa sa dihang ilang harungon ang nangiwit nga Dynamites.

Sa gihapon, ang BOC Hitz magsalig sa ilang top gunner nga si Marvin Sillar. Ang 3-2 nga BOC Hitz makalaum sab nilang Noel Medalle ug Junard Ciabo.

Kinahanglan sab nila ang suporta nilang James Jordan ug Ferdi Segue aron modaog.

Pabor hinuon sila sa tapad, kay ang Dynamites kausa pa lang midaog sud sa lima ka duwa.

Ang Dynamites magsalig sa abilidad nilang Bibit dela Cerna, Ernie Gaviola ug Shun Cal.

Giorganisar ni Roy Canillas,  ang  liga ubos sa superbisyon ni commissioner Sidney Ganapin inabagan ni Baeng Medalle.

Motabang sab sa pagpadagan sa duwa silang Noel Medalle, Ferdi Segue, Janno Boniao ug Jun Gayo.