Scratchers nais masolo ang liderato

MANILA, Philippines — Target ng Go For Gold na makuha ang solong liderato sa pagharap nito sa AMA Online Education sa pagpapatuloy ng 2018 PBA D-League Foundation Cup ngayong hapon sa Ynares Sports Arena sa Pasig City.

Magtatagpo ang Scratchers at Titans sa alas-3 habang mag-uunahan naman ang Chélu Bar & Grill at Centro Escolar University na mahablot ang pambuenamanong panalo sa kanilang duwelo sa ala-una.

Maganda ang simula ng Scratchers na kumana ng 88-75 panalo laban sa Batangas sa opening day noong Martes.

Bida sa naturang laro si dating University of the East standout James Martinez na nagsumite ng 18 puntos.

Makakasama ni Martinez sa atake sina Ron Dennison, Gab Banal at Jerwin Gaco na matikas din ang ipinamalas sa kanilang debut game.

Nais naman ng Titans na makabawi sa 83-95 pagyuko sa Marinerong Pilipino.

Sa kabilang banda, inaasahan ang matinding bakbakan sa pagitan ng Chélu at CEU na parehong paborito sa kumperensiyang ito. (CCo)