Cebu City hapit na maghari sa PNG

CEBU, Philippines – Hapit na gyud maghari ang Cebu City sa Philippine National Games (PNG) 2018  dihang napun-an pa ang ilang  medalya ngadto sa 42 golds, 52 silvers ug 54 bronzes, usa ka adlaw sa dili pa tapuson ang usa ka semanang kompetisyon sa banggiitan ug dekalibreng mga atleta lukop nasud diha sa Cebu City Sports Center (CCSC).

Samtang ang Cebu City padayong nag-una sa overall standing, ang Baguio City kalit lang mibalik sa ikaduhang puwesto uban ang 31 golds, 29 silvers ug 37 bronzes, kasagaran niini gikan sa athletics ug martial arts event. Ang Mandaluyong City mibalik sab sa ikatulong puwesto uban ang 22-12-13 medal tally, gisundan sa General Santos City nga adunay 16-22-25 tally ug Zamboanga City sa ilang 14-6-13.

Kagahapon, ang Cebu City mikabkab og upat ka golds uban ang upat ka silvers ug walo ka bronzes.

Sila si Norman Joseph Enriquez ug Zethley Mae Alferez mipukan nilang Tracy Llamas ug Marc Anthony Alcoseba sa PSTA, 64, 6-3 aron pagdaog og bulawan alang sa Cebu City sa  mixed doubles event sa tennis competition didto sa CityGreen Tennis Resorts sa Barangay Punta Princesa.

Maglaum si Enriquez nga motapos ang iyang kampanya sa PNG pinaagi sa pagdaog og laing gold sa dihang  sangkaon niya ang iyang maguwang nga si Marc Norman Enriquez sa men's finals karong adlawa.

Didto sa Mandaue City Cultural and Sports Complex, ang bantamweight nga si Dexler Bolambao midaog og laing gold sa arnis pinaagi sa live stick sparring event.

Nimina sab og dugang duha ka golds ang Cebu City gikan sa karatedo ug arnis.