La Salle tangka ang solong liderato
Laro Ngayon(FilOil Flying V Center
12:30 p.m. Letran vs JRU
2:15 p.m. Adamson vs Arellano
4:30 p.m. La Salle vs UE
6:30 p.m. FEU vs UST
MANILA, Philippines — Masolo ang liderato sa Group A ang tatangkain ng De La Salle University sa pagharap nito sa University of the East ngayong hapon sa pagpapatuloy ng 12th FilOil Flying V Preseason Cup sa FilOil Flying V Center sa San Juan City.
Nakatakda ang bakbakan ng Green Archers at mapanganib na Red Warriors sa alas-4:30 habang lalarga rin ang duwelo ng Far Eastern University at University of Santo Tomas sa alas-6:30 ng gabi.
Masisilayan din sa unang laro ang Colegio de San Juan de Letran at Jose Rizal University sa alas-12:30 ng tanghali kasunod ang laban ng Adamson University at Arellano University sa alas-2:15.
Nakatali sa three-way tie sa unahan ang La Salle, reigning UAAP champion Ateneo de Manila University at Mapua University hawak ang pare-parehong 4-0 baraha.
Subalit dalawang linggo ring napahinga ang La Salle kung saan nailista nito ang 83-51 panalo laban sa Emilio Aguinaldo College may 14 araw na ang nakalilipas.
Sa kabilang banda, nais naman ng Red Warriors na makabawi sa dikit na 60-63 kabiguan sa Gilas Cadets noong Martes.
Nasa ikapito ang Red Warriors tangan ang 1-2 marka.
- Latest
