Kumbati na sa PNG

CEBU, Philippines – Opisyal nang sugdan ang aksiyon sa Philippine National Games (PNG) karong adlawa diin 43 ka bulawang medalya ang ilogan, 23 niini sa athletics event diha sa Cebu City Sports Center.

Ang unang gold magagikan sa women's 10,000m run dungan sa pagsidlak sa haring adlaw sa alas-6 sa buntag ug madungagan kini og unom sa men's ug women's shot put, women's high jump ug boys ug men's 3,000m steeplechase.

Inig ka hapon, 17 ka bulawan ang minahon sa mga atleta sa boys ug men's 110m hurdles, girls, boys, men's ug women's 100m run, pole vault (boys,) discus throw (boys/girls), 400m hurdles (boys, girls, men ug women's), 5000m (girls/boys), men's long jump ug girls 2000m steeplechase.

Sa swimming, walo ka golds ang masakmit karon sa 200m individual medley, 100m, 1500m ug 800m freestyle ug 50m backstroke sa men's ug women's division.

Didto sa dakbayan sa Naga, walo sab ka bulawan ang madaog sa weightlifting.

Banatan sab karon ang standard event sa chess diha sa Robinsons Galleria Cebu diin si Woman Grandmaster Janelle Mae Frayna maoy mangu sa women's division ug sila si Grandmasters John Paul Gomez ug Joey Antonio maoy labing lig-on nga mga entrante sa men's category.

Si Philippine Sports commissioner Ramon Fernandez nagkanayon nga ang mga partisipante mopakita gyud sa labing maayo nilang duwa sa tinguha nga makaangkon og posibleng luna sa national teams.

Ning usa ka semanang kompetisyon, 200 ka mga miyembro sa national pool ang mopakita og aksiyon  diin ilang ipamatuod nga angayan silang mamahimong sakop sa Phl team.

"It is going to be a very exciting week because we will see some national team members competing against some of the up-and-coming athletes  who  is dreaming to represent the    country    in    future international meets like the Southeast Asian Games, Asian Games and the Olympics,"  matud pa ni Fernandez.

Isip ganti, ang PSC mohatag og insentibo pinaagi sa sports program ug equipment ngadto sa top 5 LGUs (local government units) diin ang makampiyon makadawat og P5 million, samtang ang mopahiluna  sa  ikaduha hangtod sa ikalimang dapit hatagan og P4M, P3M, P2M ug P1M.