Wa'y sukod sa bawos

CEBU, Philippines – Bangis nga panimalos maoy nakab-ot sa Houston Rockets human nila gikuso-kuso ang defending champion Golden State Warriors, 127-105 aron pagtabla sa ilang best-of-seven NBA Western Conference finals ngadto sa tagsa ka duwa kagahapon didto sa Toyota Center sa Houston, Texas.

Sila si James Harden ug  Eric Gordon mipugnit og 27 puntos matag usa aron pangulohan ang balanseng ataki sa Rockets nga daling nakabawos human napilde  sa Warriors, 119-106 sa Game-1  niadtong Martes.

"Total team effort. We played harder and smarter than game one. That was the only difference," matud pa ni Harden.

Human miabante og sayes puntos sa unang kuwarter, 26-21, misamot pa og kainit ang Rockets aron pagpaburot sa ilang labaw ngadto na sa 14 puntos sa halftime, 64-50. Wala na makabawi pa sukad niadto ang Warriors.

"We played harder, we got into them. We didn't have that same intensity in that first game. Our guys are great, they learned from it, snapped back and did the job," sumala pa ni Rockets coach Mike D'Antoni.

Si Kevin Durant maoy nangu sa Warriors uban ang 38 puntos ug si Stephen Curry mao lamang ang laing Golden State player nga nakatali og double figures.

Mihipos si Curry og 16 puntos, apan mipasud lamang og pito sa 19 niya ka itsa ug kausa lang makaigo sa   walo   niya  ka 3-point shot.

Sa kinatibuk-an, ang Warriors milansang lamang og siyam sa 30  ka 3-pointers.

Si PJ Tucker nga usa lamang ka palito ang nahimo sa Game-1, miiskor og 14 sa iyang 22 puntos sa first half alang sa Houston. Si Trevor Ariza midugang og 19 puntos, samtang si Chris Paul mitampo og 16 puntos sa habig sa Rockets.

"We still made some mistakes that we can get better at,"  matud ni Harden. "We know how tough it is to win (at Golden State) but we're ready for it," dugang pa ni Harden, kansang Rockets mobiyahe sa teritoryo sa Warriors alang sa Game-3 karong Lunes.