Cataraja mobida sa IDOL 3 boxing
CEBU, Philippines — Ang wa pay pildeng ALA Gym knockout artist nga si Kevin Jake “KJ” Cataraja naglaraw nga molingaw sa iyang mga katagilungsod didto sa Tabuelan sa iya unyang pagsalida sa main event sa “IDOL 3” boxing show karong Hunyo 16 didto sa Tabuelan Astrodome.
Si Cataraja, nga nagtangag og 7-0 nga baraha uban ang unom ka knockouts, makigbugno ni Frengy Rohi sa Indonesia sa usa ka non-title bout sud sa 10 ka hugna ubos sa flyweight division.
Lain pang mga away nga angayan lantawon naglangkob nilang Virgel Vitor sa Tagbilaran City, ug Christian Bacolod ug Jimmy Paypa pulos gikan sa dakbayan sa Sugbu.
Si Vitor mohamag ni Gerpaul Valero sa Mandaue City, si Bacolod makig-atbang ni Marvin Lulu sa Sultan Kudarat, samtang si Paypa makigtige ni Jun Ryan Quimbo sa Carmen.
Mowadwad sab sa ilang abilidad mao sila si Esneth Domingo sa Sultan Kudarat vs Ryan Makiputin sa Bukidnon; Justin Darap sa Calbayog City vs Elmer Liboon; ug JR Villafuerte sa Hinobaan, Negros Occidental vs Tomas Rebusit.
Sila si Liboon ug Rebusit pulos gikan sa Murcia, Negros Occidental, ang yutang natawhan ni three-division world champion Donnie ‘Ahas’ Nietes. (BANAT NEWS)
- Latest
