Coach Casey gitaktak sa Raptors

CEBU, Philippines – Si Dwane Casey gipalagpot kagahapon isip head coach sa Toronto Raptors, upat ka adlaw human ang No.1 team sa Eastern Conference gi-sweep sa Cleveland Cavaliers sa ikaduhang hugna sa NBA playoffs. 

Milanat og pito ka tuig ang ilang panag-uban.

Ang Raptors mikulit og franchise record nga 59 ka daog hinungdan nga sila maoy topseed sa East playoffs sa labing unang higayon sa kasaysayan sa ilang koponan.

Apan bisan pa man sa ilang kalampusan sa regular season, tataw nga dismayado gihapon kaayo ang nagduma sa Raptors ngadto ni Casey kay gisilhig sila sa Cavs sa bag-o lang nahuman nga East semis. Nahitabo kini dili lamang kausa apan duha na ka higayon.

"After careful consideration, I have decided this is a very difficult but necessary step the franchise must take," mensahe pa ni Raptors president Masai Ujiri atol sa ilang pagtagak ni Casey.  

Si Casey nagsilbe isip assistant coach sa Seattle SuperSonics sud sa 11 ka tuig sa wala pa nahimong head coach sa labing unang higayon uban sa Minnesota Timberwolves niadtong 2007.

Nagsilbe siyang assistant coach sa Dallas Mavericks sud sa tulo ka season sa wala pa gikuha sa Raptors niadtong Hunyo  2011.