Sultan nalipay nga ‘underdog’
CEBU, Philippines – Nahiayon si ALA Boxing Gym fighter Jonas ‘Zorro’ Sultan (14-3, 9KOs) nga ‘underdog batok ni IBF super flyweight champion Jerwin Ancajas (29-1, 20KOs) sa ilang all-Filipino world title showdown karong Mayo 26 didto sa Selland Arena sa Fresno, California.
Ang 26-anyos nga si Sultan nalipay nga siya ang gitan-aw nga underdog tungod kay mao kini ang himuon niyang inspirasyon aron modaog batok sa mas inilog nga si Ancajas.
“Daghan fans ang mihatag nako og gamay nga chance nga modaog pero determinado ko nga ipakita nila nga sayop sila,” matud pa ni Sultan atol sa press conference kagahapon didto sa Park Social sa Cebu I.T Park. “Mas ganado ko aning awaya. Dili ako kun di si Jerwin ang angay mapresyur.”
Dili kini bag-o ni Sultan nga usa ka ‘underdog’ kay nakabihag man siya og duha ka kanhi world champions.
Si Sultan mitay-og sa kalibotan sa boksing human niya gipilde si two-division world champion Johnriel ‘Quadro Alas’ Casimero niadtong Septiyembre sa miaging tuig nga naghatag kaniya og mandatory title shot.
Sa wala pa kini, iya nga gipatikangkang si kanhi WBC flyweight king nga si Sonny Boy Jaro sa ilang sangka niadtong Mayo 2017.
“This is not new for him (Sultan),” matud pa ni ALA chief trained Edito Villamor.
“Jonas is a smart fighter and he knows how to adjust against his opponent. We are very positive with his chance. Jerwin is a good boxer but we already knew his weakness.”
Si Sultan uban sa iyang stablemate ug three-division world champion nga si Donnie ‘Ahas’ Nietes molupad paingon sa Estados Unidos karong weekend aron magbansay sa Wild Card Gym ni Freddie Roach.
Si Nietes (41-1, 23 KOs) mangandam alang sa iyang WBO super flyweight title fight batok sa laing Pinoy nga si Aston Palicte (24-2, 20KOs).
“I am confident in beating him. It doesn’t make a difference whether I fight a foreign opponent or a Filipino. I am focus on my goal and that is to get that belt,” matud pa ni Nietes.
Sa laing bahin, ang ikatulong edisyon sa ‘IDOL’ boxing series gitakda sa Hunyo 16 didto sa Tabuelan Astrodome.
Bidahan kini ni undefeated Kevin Jake ‘KJ’ Cataraja nga makigsinukliay og kumo ni Indonesian Frengky Rohi sa usa ka 10-round non-title bout ubos sa flyweight division.
- Latest
