Tuburan, Balamban, Medellin abante sa Gov's Cup q’finals
CEBU, Philippines – Ang Tuburan, Balamban ug Medellin miinat sa impresibo nilang records ngadto sa 4-0 aron pag-angkon og luna sa quarterfinals sa tagsa-tagsa nila ka mga bracket sa 2nd Governor’s Cup Inter-Cities and Municipalities Under-21 Developmental Basketball Tournament.
Sa North Division Bracket 3 nga giduwa didto sa Tabogon municipal gym niadtong Miyerkules sa gabii, ang Tuburan wa’y kaluoy nga milubong sa Tabogon, 120-87, samtang ang Balamban mipatiurok sa Tabuelan, 96-79 aron pagpabilin sab nga wa’y pilde human sa upat ka duwa.
Si Steve Fritz Yuson mipupo og 12 sa iyang 23 puntos sa ikaduhang kuwarter diin ang Tuburan mipabuto og 34-22 run aron pagposte og 55-38 nga labaw sa halftime. Gitak-op sa Tuburan ang duwa pinaagi sa 41-21 rally hinungdan sa 33 puntos nga demolisyon.
Sa laing aksiyon, ang Balamban nagsandig sa maanindot nga salida ni Albert John Sacayan nga mihipos og 21 puntos, apil na ang walo sa ikaduhang kuwarter nga maoy nakapaabante kanila og 13 puntos sa halftime, 48-35.
Sa North Division Bracket 4 didto sa Daanbantayan Sports Complex, si Fritz Saladaga miposa og 26 puntos sa dihang ang Medellin nagpabiling wa’y pilde human gilubong ang San Remigio, 103-72.
Sa laing duwa, ang Madridejos mipayaka sa host Daanbantayan, 81-71.Pareho nilang gitapos ang eliminasyon bitbit ang 2-3 nga baraha, apan dili kini igo nga maghatod kanila sa quarterfinals.
Sa South, ang Badian (2-1) mipakaging sa Oslob (0-3), 90-76, ang Ginatilan (3-0) midaog sa Samboan (1-2), 90-75, samtang ang Alegria (3-0) nakaipsot batok sa Santander (0-3), 72-71 didto sa Alegria municipal gym.
- Latest
