Pagara mobida sa ‘Pinoy Pride 44’
CEBU, Philippines — Misyon ni ‘Prince’ Albert Pagara nga ibalik iyang estado isip usa sa mga world title contenders og sugdan niya kini sa “Pinoy Pride 44” sa Hunyo 9 didto sa iyang hometown sa Maasin City.
Ang 24-anyos nga si Pagara (29-1, 20KOs) mopamatuod nga aduna pa siya’y kapabilidad nga mamahimong world title challenger sa iyang pakigsangka ni Laryea Gabriel Odoi (20-3, 14KOs) sa Ghana alang sa bakanteng WBO Intercontinental super bantamweight title.
“Krusyal gyud ni nga fight sa akoa. Gusto ko ipakita nga nibalik nako and mas improve ko di pareha sa una,” matud pa sa ALA Boxing Gym star. Si Pagara miingon nga nakarekober na siya gikan sa ngil-ad niyang kapildihan sa mga kamot ni Mexican Cesar Juarez duha ka tuig ang milabay didto sa California.
Human niadto, si Pagara midaog sa tulo ka sunod-sunod niyang away, apan ang sangka batok ni Odoi ang giisip niyang taytayan aron subli siya nga mailhan isip usa ka contender sa iyang dibisyon.
“Nindot ni nga chance nako. Gusto gyud ko modaog ani nga bakus kay makatabang ni nga masud ko balik sa top 10,” matud pa ni Pagara kinsa rank No. 12 karon sa WBO.
Sa iyang bahin, si ALA chief trainer Edito Villamor mibutyag nga daghan sila og plano alang ni Pagara lakip na ang usa unya ka “rematch” batok ni Juarez.
Sa supporting bout, si Jeo ‘Santino’ Santisima (15-2, 13KOs) mosuway pagsakmit sa labing una niyang regional title sa iyang pakigsangka ni Likit Chane (16-5, 10KOs) sa Thailand alang sa WBO Oriental junior featherweight belt.
Ang maguwang ni Albert ug kanhi No.1 contender nga si Jason ‘El Niño’ Pagara (40-3, 25KOs) makigbinukbukay ni Indonesian Geisler AP (12-10, 9KOs).
- Latest
