Palaro mosikad na sa Vigan

CEBU, Philippines — Ang ika-16 nga edisyon sa Palarong Pambansa pormal nang mosikad karong hapon didto sa Quirino Stadium sa Vigan, Ilocos Sur ug mismo si Presidente Rodrigo Duterte maoy motambong niini.

Uban ni Duterte ang iyang anak nga si Davao City Mayor Sara Duterte kabahin na sab sa tinguha sa Davao nga maoy mo-host sa Palaro sunod tuig. 

Gawas sa Davao, laing dapit sa Mindanao nga naglaraw nga mo-host sa maong tinuig nga kompetisyon alang sa mga elementarya ug sekondarya nga mga atleta sa nasud mao ang Misamis Occidental, General Santos City ug Zamboanga Peninsula.

Ang pipila ka mga Philippine sports legends sama nilang Lydia de Vega-Mercado, Eugene Torre, Efren ‘Bata’ Reyes ug Paeng Nepomuceno motambong sab sa maong kalihukan aron paghatag og dugang kadasig ug inspirasyon sa mga batan-ong atleta nga gustong mosunod sa ilang lakang.

Imbitado sab si Senador Manny Pacquiao, apan wala pa matino kun makatunga ba kini.

Sa kinatibuk-an, kapin sa 20,000 ka mga atleta, coaches ug opisyales ang mag-abot sa Vigan.

Ilang ilogan ang 1,311 ka medalya, apil na ang 397 ka golds.

Gawas sa medal-rich athletics ug swimming, mga events nga kumbatihan mao ang archery, arnis, badminton, baseball, basketball, billiards, boxing, chess, football, futsal, gymnastics, sepak takraw, softball, swimming, table tennis, taekwondo, tennis, volleyball, wrestling ug wushu.

Apil sab ang aero gymnastics, dancesport ug pencak silat, apan usa lang ka demonstration sports ug wa’y labot sa medal tally.