Team LeBron batok Team Steph karon

CEBU, Philippines — Mosidlak ang tanang mga NBA stars karong adlawa sa sangka tali sa Team LeBron ug Team Steph nga maoy labing giatangan sa NBA All-Star Games didto sa Staples Center sa Los Angeles, California.

Kini ang unang higayun nga ang pangan sa mga team captain ang gamiton sa matag koponan lahi sa naandan nga East vs West format. Sila si James ug Curry ang gihimong team captain tungod usab kay sila ang nakakuha og labing daghang botos gikan sa mga fans.

Ang Cleveland Cavaliers star nga si James moduwa uban sa iyang karibal nga si Oklahoma City Thunder Kevin Durant kinsa maoy una niyang gipili sa All-Star draft. Anaa usab sa iyang koponan sila si Paul George ug Russell Westbrook sa Oklahoma City Thunder, Andre Drummond (Detroit Pistons), Kemba Walker (Charlotte Hornets), Goran Dragic (Miami Heat), Victor Oladipo (Indiana Pacers) ug Anthony Davis sa New Orleans Pelicans.

Atbangan sila sa solidong lineup ni Curry kinsa bisan pa og wala si Durant, masaligon nga mudaog tungod nila ni Klay Thompson ug Draymond Green. Anaa usab sila si James Harden sa Houston Rockets ug Giannis Antetokoumpo sa Milwaukee Bucks. Mokumpleto sa ilang lineup sila si Karl Anthony Towns ug Jimmy Butler sa Minnesota Timberwolves, Joel Embiid (Philadelphia 76ers) ug Demar Derozan ug Kyle Lowry  sa Toronto Raptors. (BANAT NEWS)