Alvarez gipulbos si Chavez, Golovkin maoy sunod target
CEBU, Philippines - Yanong gidominar ni Saul "Canelo" Alvarez si Julio Chavez Jr. aron pag-angkon niini og impresibong kadaogan pinaagi sa unanimous decision sa 12 ka hugna nilang 'mismatch' kagahapong adlawa didto sa T-Mobile Arena sa Las Vegas, Nevada.
Taliwala sa naglagiting niyang kalampusan, si Alvarez way kurat nga mipadayag sa sunod niyang target nga mao ang eksplosibong si Gennady Golovkin.
Human gikastigo si Chavez, ang kasamtangang WBO light middleweight champion nagkanayon nga gusto niyang sangkaon si middleweight champ Golovkin karong Septiyembre 16.
"Golovkin, you are next, my friend. Where are you? It's on," matud pa ni Alvarez sigun sa taho sa Agence France Presse.
Gikan sa pagsugod sa away, gihimo sa 26-anyos nga si Alvarez nga 'punching bag' si Chavez nga iyang gipauwanan sa tanang klase sa suntok ug kagumkon nga kombinasyon.
Sa ikalimang hugna, nagkadugo na ang ilong ni Chavez ug pag-abot sa katapusang hugna, halos mosira na ang wala niyang mata gumikan sa kahubag.
Gawas nga kulatado, gi-bohan pa si Chavez sa mga nanan-aw nga dismayado sa bati kaayo ug way ayo niyang inawayan.
Sa kinatibuk-an, si Alvarez mipatugpa og 228 ka kumo kumpara sa 71 lamang ka suntok nga gibuhian ni Chavez.
Si Alvarez nagbitbit na karon og 49-1-1 record. Iyang natilawan ang bugtong niyang pilde sa mga kamot ni Floyd Mayweather niadtong 2013. (FREEMAN)
- Latest
