Our Lady of Lourdes klaro na sa sunod hugna
CEBU, Philippines - Klaro na kaayo nga ang Our Lady of Lourdes usa sa moabante sa sunod nga hugna human gipaluhod ang Solita/Tabok, 74-64 aron pabiling magsolo sa liderato sa Los Amigos Basketball Association (LABA) Commissioner’s Cup 2017 niadtong Lunes sa gabii didto sa Co Tiao King gym sa Barangay Tabok, dakbayan sa Mandaue.
Naglisud ang Our Lady of Lourdes sa pagsugod hinungdan nga nabiyaan sila og singko puntos paghuman sa unang 10 minutos sa duwa, 13-18. Diha na sila nakarekober sa tunga-tungang bahin sa third period human si LABA president Gilbert Sebandal miposa sa ikaduha niyang 3-pointer alang sa ilang 47-44 nga bentaha. Giinat pa ang labaw ngadto sa 10 puntos.
Si Tawing Grafe maoy nangu sa scoring sa iyang 20 puntos uban ang lima ka rebounds. Ang team manager nga si Sebandal miambit og 12 puntos, samtang si Canjo Echavez mitampo’g 10 puntos sa Our Lady of Lourdes nga miinat sa ilang baraha, 7-0.
Wala magsilbe ang 16 puntos ni Banjo Hatamosa kay nakatilaw ang Solita/Tabok sa ikaupat nilang pilde sa pito ka duwa.
Si Neil Marturillas miabuno og 14 puntos ug 14 sab ka rebounds sa napildeng koponan.
Sa laing aksiyon, ang RMB Learning Institute ni playing team owner Pastor Roger M. Baladjay mipilde sa team Quiñahan, 57-50 alang sa ilang 4-2 nga baraha.
Labaw ang Quiñahan, 50-49 sa nahabiling 2:40 sa duwa, apan si Barak Recto mipasud og sunod-sunod nga basket aron sakmiton og balik ang momentum, 53-50 sa katapusang 1:10 sa fourth quarter ug wala na sila molingi pa sukad niadto. Si Recto mihipos og 15 puntos sa RMB Learning Institute, samtang si playing coach Tony Alcover miamot og kuwatro.
Ang 4-4 nga Quiñahan gipangulohan nila ni Aldrin Gonzaga ug Richard Madrid nga nagkumboya’g 26 puntos.
Sa pasiunang duwa, ang Monterroyo/Co-Jordan nakabawi sa ilang kapildihan pinaagi sa paglubong sa Explorer, 66-54.
Gipangulohan ni Johnny Landiza ang daog sa iyang 14 puntos, ang co-managers nga sila si Richard Jordan ug Dr. Raul Monterroyo nagkumbinar og 21 puntos sa ilang koponan nga nagsolo sa ikaduhang dapit bitbit ang 6-1 record.
Ang mga duwa gipadagan ni commissioner Albert Ramos sa abag ni Rudy Candelada ug nilang Willy Medillo, Lloyd Chavez ug Richard Limosnero.
Puntos matag usa
Unang duwa:
Monterroyo/Co-Jordan (66) – Landiza 14, Jordan 11, Monterroyo 10, Mendoza 9, Tañan 7, Caballero 4, Paciencia 3, Ramos 2, Ecot 2, Enad 2, Panugaling 2.
Explorer (54) – Dayanan 15, Gomez 14, Baloro 13, Villarosa 6, Nacional 4, Gelbolingo 2.
Ikaduhang duwa:
RMB (57) – Recto 15, Rogado 10, Alcover 4, Anghay 4, Alibo 4, Catinoy 4, Baladjay 3, Diaz 3, Lagaras 2, Migallen 2, Adolfo 2.
Quiñahan (50) – Gonzaga 15, Madrid 11, Colanse 6, Ermac 5, Beldera 4, M. Marturillas 4, Cena 3, Carvajal 2.
Ikatulong duwa:
Our Lady of Lourdes (74) – Grafe 20, Sebandal 12, Echavez 10, Bercero 8, Chavez 6, Pacquiao 4, Rabanal 3, Cinco 3, Ubas 3, Ranile 2, Incorporado 2, Limosnero 2.
Solita/Tabok (64) – Hatamosa 16, N. Marturillas 14, Florentino 9, Pepito 6, Tarriman 5, Rosas 4, Diano 4, Talledo 4, Paradiang 2. (BANAT NEWS)
- Latest
