Villanueva pilde ni Tete
CEBU, Philippines - Napakgang ang tinguha ni 'King' Arthur Villanueva sa ALA Boxing Gym nga makaaway og balik alang sa world title human siya mapilde pinaagi sa unanimous decision batok ni Zolani Tete sa South Africa sa ilang WBO eliminator nga kalit giusab ngadto sa usa ka WBO interim bantamweight championship bout niadtong Sabado sa gabii didto sa Leicester Arena sa England.
Human sa 12 ka hugna nga kumbati, si Tete midominar ni Villanueva aron pagdaog niini sa iskor nga 120-109 ug duha ka 119-108.
Sigun sa taho ni Ron Jackson sa supersport.com, kontrolado ni Tete ang away ug wala gyud maka-arti si Villanueva sa kinatibuk-ang bahin sa ilang bugno. Gani sa ikapitong hugna, si Tete mipatugpa og makusog nga right straight nga nakatumba kadiyot sa Pinoy niining kontra.
Ang 28-anyos nga si Tete nagbitbit na karon og 25-3 record uban ang 19KOs, samtang si Villanueva nadakin-as ngadto sa 30-2 uban sa 16KOs.
Sa iyang kadaogan, si Tete nakaangkon og katungod nga moaway sunod alang sa WBO title nga kasamtangan karong bakanti human ang kanhi kampiyon nga si Marlon "Nightmare" Tapales nalangkatan sa iyang bakus gumikan kay wala makakuha sa eksaktong timbang nga 118 ka libras niadtong Sabado sa hapon kon usa ka adlaw sa wala pa ang gikatakda niyang pagdepensa batok sa Hapon nga si Shohei Omori didto sa Edion Arena sa Osaka, Japan.
Ang resulta sa away nilang Tapales ug Omori wala pa mahibaw-i samtang sa pagsulat ning taho kagabii. Kun ugaling modaog si Tapales, mabakanti ang WBO title apan kun si Omori maoy modaog, siya maoy yukboan nga bag-ong WBO bantamweight champion ug obligado nga modepensa batok ni Tete. (EBV) (BANAT NEWS)
- Latest
