Bogo, 3-0 na sa Governor’s Cup
CEBU, Philippines - Gipilde sa Bogo City ang Madridejos, 94-81 aron pagharos og daog sa tulo nila ka duwa didto sa Bantayan Island ug ingon man pag-angkon sa solong liderato sa North Bracket 3 sa 2017 Cebu Governor’s Cup Under-21 Inter-Cities/Municipalities Basketball Tournament niadtong Domingo sa gabii didto sa Barangay Ocoy covered court sa lungsod sa Sta. Fe.
Si Justine Valenzuela mibomba og 12 sa iyang 29 puntos sa unang kuwarter alang sa Bogo nga wala na molingi pa sukad nakalabaw og 11 puntos, 32-21.
Miabag ni Valenzuela mao sila si Augustin Saludaguit ug Neljoe Aballe nga nagkumboya’g 38 puntos. Si Marjhon Alontaga maoy nangu sa Madridejos uban sa iyang 28 puntos, samtang si Decoroso Cahutay dunay 19 puntos sa pilderong kawsa.
Sa ubang mga duwa didto sa Norte, ang Medellin milansang sa una nilang duwa human gilubong
ang nagkagidlay nga San Remigio, 103-86, samtang ang Bantayan nakasagunson og duha ka daog human gipaluhod ang Sta. Fe, 85-65.
Ang Bantayan nagbitbit na karon og 2-1 record, ang Medellin ug Madridejos dunay managsamang 1-2 nga baraha, samtang bokya pa ang San Remigio sud sa tulo ka duwa.
Sa South Bracket 1, ang Talisay City Aqua Stars miposte sa ikaduha nilang daog human gilampurnas ang Naga City, 76-58 didto sa Minglanilla Sports Complex.
Nakaduha na sab ka daog ang host Minglanilla human gilubong buhi ang Argao, 116-84, samtang ang San Fernando Spartans nakabawi dayon pinaagi sa pagdemolis sa Sibonga, 90-74. (BANAT NEWS)
- Latest
