Lyndon ug Ricardo Sumalinog naka- grandslam sa 'Balik Baroto Regatta'

CEBU, Philippines - Wa’y pagbahar ang abilidad sa managsuong Lyndon ug Ricardo Sumalinog hinungdan sa ilang pagsakmit og grandslam title sa “Balik Baroto Regatta”, usa ka talagsaong lumba sa baroto nga gipahigayon kabahin   sa  ika-72 nga anibersaryo sa maka-saysayanong “Takas sa Talisay” niadtong Domingo didto sa Barangay Poblacion sa dakbayan sa Talisay.

Taliwala sa naglagiting nga kainit, ang mga Sumalinog sa Barangay Tangke tayhas kaayong minabigar sa rota nga naglangkob og kapin sa pito ka milya aron pagtapos sa lumba sud sa usa ka oras, 50 minutos ug 48 segundos.

Sila maoy nag-una gikan sa pagsugod ug wala na molingi pa dayon na ngadto sa paglangkat sa ikatulo niining sagunson nga korona ning  tinuig   nga karera nga gipasiugdahan sa Balik Baroto Movement nga gipangulohan sa founding chairman niining si Dir. David ‘Kuya Boy’ S. Odilao, Jr.

Ang mga Sumalinog, nga wa’y pilde-pilde sa tanang lumba nga ilang gisalmotan, apil na niini ang didto sa Tuburan sa  Araw ng Kagitingan  ug Sinulog Regatta sa miaging tuig, nakadawat og P50,000 nga ganti.

Adlaw gyud kadto sa mga Talisaynon nga miharos sa nag-unang lima ka puwesto pinaagi nilang Gilberto Obrero ug Frankie Gamboa (1:52:04), Mario Canon ug Arnold Cabalda (1:52:06). Virgilio Jumao-as ug Marto Abines (1:54:23) ug Limdel ug Jimmy Malinao p(1:58:40).

Sila si Esperidion ug Benirando Ybañez sa isla sa Cuaming, Bohol maoy ikaunom sa oras nga 2:00:12, samtang naglangkob sa top 10 mao ang pulos taga lungsod sa Tuburan nga sila si Jerome Domecillo ug Balaw Lape (2:01:46), Allan ug Gaga Lopez (2:02:00), Charlie Abapo ug Joefil Labuca (2:02:03) ug Thom Jonas Cabando ug Ruben Abapo (2:04:44).

Nagmalampuson ang maong kalihukan nga gisalmotan og dul-an sa 100 ka mga mananagat gikan sa Cebu, Bohol, Leyte ug Lanao del Norte   pinaagi sa hugtanong suporta sa lokal nga kagamhanan sa Talisay ubos   sa  liderato   ni Mayor Eduardo  ‘Eddiegul’ R.  Gullas  ug  ingon  man sa Office of the Presidential Assistant for the Visayas pinaagi ni Sec. Michael Lloyd Dino, Tuburan LGU ubos ni Mayor Democrito ‘Aljun’ Diamante, Jr. ug sa Fraternal Order of Eagles (Philippine Eagles). (BANAT NEWS)