Carzano naghari sa Mingla Chessfest
CEBU, Philippines - Si Johnny Carzano mikulit og krusyal nga daog batok ni Lloyd Sy sa ikapito ug katapusang hugna aron pagsakmit sa titulo sa 1st Elanito Peña Mayor’s Cup Chess Tournament niadtong Domingo didto sa Minglanilla Sports Complex.
Mibulsa si Carzano og P3,000 sa pagdominar niini sa torneyo alang sa class B players kon kadtong dunay NCFP (National Chess Federation of the Philippines) rating nga 2000 paubos bitbit ang 6.5 puntos.
Gipilde ni Bobby Quiros si George Villasencio sa katapusan niyang duwa ug mao kini ang iyang gikinahanglan aron paglandig sa ikaduhang puwesto uban ang 6.0 puntos, samtang si Martin Kwan miwani ni Leo Cortes aron pagpahiluna niini sa ikatulong puwesto uban ang 5.5 puntos. Si Quiros nakadawat og P2,000, samtang si Kwan nakaangkon og P1,000.
Nagsawo sa ikaupat hangtod sa ikasiyam nga puwesto uban ang managsamang 5.0 puntos mao sila si Lloyd Sy, Nic Cuizon, Jave Peteros, Hector Villamora, Marionito Abad ug Villasensio. Samtang sila si Eduardo Flores, Junry Siloy, Dennis Gonzales ug Junny Aprovechado maoy mikumpleto sa top 13 uban ang 4.5 puntos. Human sa Minglanilla, ang aksiyon dad-on balik sa Knight Attack Chess Cafe sa Robinsons Galleria Cebu karong Marso 12 alang sa “Little Wesley So Cup” nga giorganisa sa Cebu Executives and Professionals Chess Association (CEPCA) alang sa mga magduduwa og ahedres nga nag-edad og 12 anyos paubos.
- Latest
