Cebu mo-host sa Milo Marathon national finals

CEBU, Philippines - Sa labing unang higayon, ang Sugbo maoy mo-host sa national finals sa prestihiyosong Milo Marathon nga gikatakda karong Disyembre 3. Si Ricky Ballesteros nga maoy gitahasan pag-organisar sa lumba, mao ang mikompirma niini human siya giabisohan ni City Traffic Operations Management (CITOM) chief Rafael Yap.

Sa sinugdanan, si Ballesteros nagduha-duha pagsanong sa  maong tahas, apan sa kadugayan iya kining gidawat human gipasaligan ni Yap nga dili maapektohan ang karera sa implementasyon sa Bus Rapid Transit (BRT) project kay dili pa man kini kasugdan sa maong petsa.

“I was waiting for a written letter from Rafael Yap at first. Kanang black and white gyud ba. But

when we talked, he said “sige it’s a go na”. He assured me that the BRT project will not affect the staging of the Milo Marathon so I accepted the hosting,” matud pa ni  Ballesteros.

Si Ballesteros ug ang iyang grupo bag-o lang gipasidunggan isip “Best Organizer” sa Milo

Marathon ug ingon man sa Milo Little Olympics mao nang mas daku nga hagit ang nagpaabot kanila sa unahan pag-host sa maong event sa unang higayon.

Ang Cebu mao lamang ang ikatulong binyu gawas sa Manila nga mo-host sa national finals sunod sa Angeles City ug Iloilo. (BANAT NEWS)