Ballerina migilak sa dancesport

CEBU, Philippines - Ang ballet ug ballroom dancing pulos mga sayaw, apan managlahi lang ang estilo. Apan ang usa ka indibidwal mahimong mogilak sa duha.

Mao kini ang gipamatud-an sa 14-anyos nga si Kristel Ivy Boctil Evangelista, usa ka ballerina nga mihimo og impresiyon sa dancesport event sa bag-o lang natapos nga  2017 Central Visayas Regional Athletic Association (CVIRAA) Meet didto sa Naga City, Cebu.

Si Evangelista nakat-on og ballet sa edad nga tres anyos pa lamang sa Ballet Center  diha sa Ayala Center  Cebu.   Nangtungha siya kaniadto sa Philippine Christian Gospel School, apan atua na karon sa Sto. Niño National High School sa Talibon, Bohol diin ang iyang amahan nga si Dave usa ka konsehal nga anaa na sa ikatulong termino. Ang iyang inahan si Mary May.

Ang iyang pagbalhin sa Bohol maoy nakapugos ni Evangelista pagsuway sa dancesport ug sa usa ka tuig niyang pagkat-on niini, mihimo dayon siya og kasikas. Nakampiyon siya sa zone meet ngadto sa provincial meet sa Bohol hinungdan nga nakaapil siya sa CVIRAA sa miaging semana.

Tuod man wala pakyasa ni Evangelista kadtong mga naglaum niya kay taliwala sa lig-ong mga kontra nga sagad Sugbuanon, mipakita siya og tumang kadasig dayon na ngadto sa pagdaog og silver medal sa Latin Standard category uban sa iyang pares nga si Jay Ronald Auztero. (BANAT NEWS)