Rotarians mopasiugda’g 'triathlon for a cause'

CEBU, Philippines - Ang mga Rotarians mopasiugda og usa ka triathlon event alang sa usa ka mahinungdanong kawsa nga pagaulohan og 1st Rotary Corporate Triathlon karong Hunyo didto sa Punta Engaño, dakbayan sa Lapu-Lapu.

Ang benepisyaryo sa maong karera mao ang mga bata nga hinikawan sa maayong palad nga nanginahanglan og medikal nga atensiyon.

Matud pa ni Rotary president Bernard Vonn Sia atol sa usa ka press conference diha sa Casino Español sa miaging adlaw, nga kun pila man gani ang ilang makita sa maong kalihukan ilang ipundo sa operasyon sa inisyal nga 12 ka mga bata nga dunay gihambin nga balatian.

Padaganon sa Cornerstone 8080 Events Inc., ang maong lumba naglangkob og 1.6-kilometer swim, 50K bike ug 10K run. Mga kategoriya nga kumbatihan mao ang elite/open, age-group, relay ug corporate challenge nga langkuban og mga teams nga dunay unom ka miyembro, apan kadto lamang labing nindot nga oras sa upat nila ka miyembro (tulo ka lalaki ug usa ka babaye) maoy kuwentahon aron pagdetermina kinsa’y mga mananaog.

Kadtong mga interesado, mahimong magparehistro sa Digital Walker sa Ayala ug SM, sa Missing Link sa Robinsons Galleria Cebu,  Senor Kimchi sa Axis Vibo,  Bikecology   sa BTC,  Cyclelogic sa Parkmall o sa YKK Bike Shop.      Alang sa dugang mga pakisayod, mahimong motawag   ni   Steve Maniquis  0917-3200849 o di ba kaha e-mail sa [email protected]. (BANAT NEWS)