Upat ka oras nga basketbol

CEBU, Philippines -  Mipabuhagay og 37 puntos si  Paul Millsap,  apil na niini ang lay-up sa nahabilin nga 27 segundos sa ikaupat nga overtime nga maoy nag-aswat sa Atlanta Hawks ngadto sa kulbahinam nga kadaugan batok sa 142-139  batok sa New York Knicks sa NBA kagahapon  didto sa Philips Arena sa Atlanta, Georgia.

Ang labing unang upat ka overtime nga nasinati sa Knicks sud sa 66 ka tuig milanat og dul-an sa upat ka oras.

Si Millsap miduwa sud sa 60 minutos,  ingon man silang Carmelo Anthony sa Knicks ug Dwight Howard sa Hawks nga parehong na-fouled out.

Si Anthony nga mipabuto og 45 puntos, maoy mipasud sa itsa nga miresulta ngadto sa unang overtime, apan na-fouled out siya sa nahabilin nga 12.9 segundos sa ikaduhang overtime. Samtang si Courtney Lee milansang og tres nga maoy hinungdan sa ikaduhang OT ug ang iyang duha ka free throws maoy nakalugway og dugang singko minutos sa makutas nga duwa.

Mao kadto ang labing unang upat ka overtime nga duwa sa Knicks sukad niadtong Enero 23, 1951 diin sila napilde sa Rochester. Katapusang nakaupat ka overtime ang Hawks niadtong Marso 25, 2012 diin sila midaog sa Utah Jazz.

Sa laing mga aksiyon, ang labing init nga karibal sa liga nga mao  ang defending champion Cleveland Cavaliers ug Golden State Warriors mipaksit sa tagsa-tagsa nila ka mga kontra.

Si Kyrie Irving mipupo og 29 puntos, samtang si LeBron James miposte og 25 puntos ug 14 ka rebounds sa dihang gipakaging sa Cavs ang Oklahoma City Thunder, 107-91 bisan pa man og si Russell Westbrook mirehistro sa ika-24 niyang triple-double karon nga season.

Misamot og katam-is ang daog sa Cavs alang ni James human siya mihimo og kasaysayan isip labing unang player nga nakahipos og 20,000 puntos sul-ot ang uniporme sa Cleveland.

Sa pikas bahin, si Westbrook naminghoy bisan pa man og miratsada og 20 puntos, 12 ka rebounds ug 10 ka assists sa ika-61 nga triple-double sa iyang karera.

Wala sab magpabitin ang Warriors nga nakapugnit og 33 puntos ug 10 ka rebounds ni Kevin Durant sa dihang gipukan niini ang Portland Trail Blazers, 113-111.

Kini ilang nakab-ot  bisan pa man og wala makaduwa si Stephen Curry gumikan kay nagsakit ang tiyan.

Gawas ni Durant, misalida sab si Klay Thompson uban sa iyang 27 puntos alang sa Warriors nga midaog og 10 sa katapusan nilang 11 ka duwa.

Sa laing bahin, si Seth Curry miyagyag og 24 puntos sa dihang ang Dallas Mavericks mipakgang sa 12 ka sunod-sunod nilang kapildihan sa mga kamot sa San Antonio Spurs, 105-101. (BANAT NEWS)