Baby Lancers nakauna sa NBTC finals
CEBU, Philippines - Ang University of the Visayas (UV) Baby Lancers madasigon nga mibangon gikan sa bugnaw nga sinugdanan dayon na ngadto sa pagpakurat sa six-time champion Sacred Heart School-Ateneo de Cebu (SHS-AdC) Magis Eagles, 82-80, sa Game 1 sa “best-of-three” SM National Basketball Training Center (NBTC) League Cebu division finals kagahapon didto sa Capitol Parish gym sa dalan Escario, dakbayan sa Sugbo.
Malangkat na sa Baby Lancers ang korona kun ugaling usban nila og parot ang Magis Eagles sa Game 2 nga duwaon karong alas 2:30 sa hapon didto sa Minglanilla.
Seguradong sadya ug bibo ang pinaksitay karon sa Baby Lancers ug Magis Eagles gumikan kay dul-an sa 3,000 ka mga estudyante ang motan-aw sa duwa. Ang Sisters of Mary School-Boystown mopadala sa tanan niining tinun-an nga moabot og 1,600, samtang kapin sa usa ka libo sab ka mga estudyante ang ipadala sa UV-Minglanilla aron moabiba sa duha ka koponan.
Ang sentrong si Jancork Cabahug maoy nangu sa UV uban sa iyang 26 puntos, samtang lain pang tulo ang naka-double figures sa kampo sa Baby Lancers.
Si Jimparul Amisto miamot og 14 puntos, samtang sila si Justin Jake Rosete ug Biern Laurente nagkumboya’g 22 puntos alang sa Baby Lancers nga wala mawad-i og paglaum human mabiyai og 11 puntos sa halftime, 45-34.
Hinay-hinay nga mibanat ang Baby Lancers sa ikatulong kuwarter hangtod nga ilang nailog ang labaw sa daginutong oras nga nahabilin. Duna pa unta’y tsansa nga maka-overtime ang Magis Eagles, apan wala mapasud niini ang duha ka krusyal nga free throws sa nahabiling dos segundos sa duwa.
Si Andrew Velasco mikadlit og 26 puntos, samtang sila si Travis Mantua ug Jeremy Nacua nakatigum og 23 puntos alang sa Magis Eagles, nga seguradong buhaton ang tanan aron makabawos sa Baby Lancers ug malugwayan pa ang series. (BANAT NEWS)
- Latest
