UV, USJ-R abante na sa semifinals
Kini dihang naangkon sa duha ang nag-unang duha ka luna sa semifinals human midaog batok sa tagsa-tagsa nila ka kaatbang niadtong Biyernes didto sa Bulacao Talisay Sports Complex.
Midaog ang Jaguars human nila matangag ang SWU Cobras sa iskor nga 61-50, samtang gilat-an sa Lancers ang CIT-U Wildcats, 107-65.
Ang UV nga nagtangkil og 4-0 segurado na sa no. 1 spot bisan pa og mapilde sila sa SWU nga kasamtangan nagduwa sa pagsuwat niini kagabii.
Kun mapilde ang UV magtabla sila sa USJ-R sa managsamang 4-1 records, apan ang Lancers maoy moangkon sa no. 1 gumikan kay ila man nga giihaw ang Jaguars, 92-87 niadtong Enero 19.
Sa duwa kagabii, sila si Joshue Segumpan ug Jason Balabag nagtampohay og 15 puntors aron bidahan ang Lancers, kansang nagpungasi nga ataki nakapalubong sa Wildcats sa halftime, 48-28. Ang Lancers nga wa’y katagbawan miinat pa sa ilang labaw, 79-51 ug didto misihag na og maayo ang ilang kadaugan. Wala sab kapugngi ang kamangtas ni Michael Maestre nga milugit og 14 puntos, samtang sila si Monic Soliva ug Tristan Albina miligwat og 12 ug 11 puntos.
Sila lang si Tony Lucena ug Joshua dela Cerna ang miiskor og double figures sa CIT-U nga miokupar sa ikatulong dapit uban ang 2-3 record. Mahimo pa kining mausab depende sa resulta sa nahabiling mga duwa sa SWU, UC ug USPF.
Sa laing bahin, sila si Ricky Peromingan ug Adam Camara parehong mirehistro og double digits aron pangulohan ang tagsa-tagsa nila ka koponan.
Si Peromingan mitusak og 17 puntos aron pangulohan ang balanseng opensa sa USJ-R nga miposte og 34-19 paghuman sa unang duha ka kuwarter.
Sa iyang bahin, si Camara mipabuhagay og 21 puntos aron mao sab ang mangu sa SWU nga kanunay naggukod sa duwa.
Ang liga namugna pinaagi sa paningkamot ni Bulacao Talisay Brgy. Capt. Raul Cabanero, inabagan sa iyang mga konsehales ilabi na nilang Banjo Abastillas, Darwin Cabanero ug Agnes Lastimosa, ingon man sa tanang barangay official ug SK task force. Ang mga duwa ubos sa superbisyon ni CESAFI deputy commissioner Danny Duran sa abag ni head technical referee Edwin Dejacto Sr.
Puntos matag usa
Unang duwa:
UV (107) – Segumpan 15, Balabag 15, Maestre 14, Soliva 12, Albina 11, Villacerna 9, Bolanio 8, Suerte 7, Napao 6, Macion 5, Saen 5.
CIT-U (65) – Lucena 15, Dela Cerna 14, Sable 9, Ariar 6, Bucao 6, Mumar 6, Quijano 4, Nuñez 2, Pono 2, Russel 1.
Ikaduhang duwa:
USJ-R (61) – Peromingan 17, Dinolan 9, Kong 8, Mantilla 7, Catiloc 6, Jopia 6, Ewineke 2, Nuñez 2, Bayhonan 2, Sealana 2.
SWU (50) – Camara 21, Luz 7, Imperial 7, Molina 6, Polican 4, Roncal 2, Racho 2, Fernandez 1. (BANAT NEWS)
- Latest
