Free throw ni Sanchez Mipadaog sa Wildcats

CEBU, Philippines -  Usa ra ka free throw ang napasud ni Wilkin Sanchez sa katapusang sayes segundos sa fourth quarter, apan igo na kaayo kini aron    iyang mapadaog ang CIT-U Wildcats sa ligas kaayo nga duwa batok sa  USPF  Panthers, 82-81 sa 2nd Capt. Raul Cabanero Inter-Collegiate Basketball Tournament niadtong Huwebes didto sa Bulacao Sports Complex, dakbayan sa Talisay.

Hinuon si Maye Muñez maoy nangu sa ikaduhang sunod-sunod nga daog sa  Wildcats nga misungkab og 12 puntos. Ang CIT-U nakakuha sab og maayong suporta gikan nilang Joshua dela Cerna ug Mark Quijano nga mitampo’g 11 puntos matag usa.

Dumadaog na unta ang   Panthers human milabaw og tres puntos, 81-78 sa nahabiling 30 segundos sa duwa, apan napakgang kini  kay naabtan sila og demalas kay sa walo nila ka free throws nga makairog unta sa ilang iskor, usa ra ang nasulod kortesiya ni John Alocillo.

Nakaigwalis ang CIT-U, 81-all sa himalatyong segundos human masud ang free throw ni Wilkin Sanchez nga nakapakulba sa duwa.

Gihatagan pa unta og laing higayon ang Panthers nga motukob sa daog sa dihang  ila ang ball possession,  apan si Niño Batac naintersipan ni Sanchez, kinsa  nakakubit og foul nga naghatod kaniya ngadto sa free throw line nga maoy nagselyo sa kadaugan sa CIT-U ni coach Bembem  Alcaraz.

Si Batac maoy nangu sa tanang scorer sa USPF nga mikabkab og 20 puntos. Laing tulo niya ka teammates ang miiskor sab og double figures sa Panthers nga wala nakatilaw og daog sa duha ka duwa.

Sa laing duwa, ang UV  Green Lancers mikulit sab sa ilang ikaduhang sunod-sunod nga daog dihang gipanitan nila ang USJ-R Jaguars, 92-87.

Miarangkada dayon ang UV pagsugod sa aksiyon sa pagpangulo ni Jayson Balabag hinungdan nga ila dayon nga gilubong ang USPF paghuman sa first period, 21-8.

Si Jayson Balabag mibugha og 29 puntos, si Josue Segumpan  mihipos og 19 puntos ug si Monic Soliva adunay 15 puntos alang sa Green Lancers nga temporaryong lider sa standing uban sa CIT-U sa managsama nilang 2-0 nga baraha.

Ang  Jaguars nga nagtangag og 0-1 nga baraha, gipangulohan ni Ralph Dinolan nga mikitkit og 18 puntos, gisundan ni Miguel Gastador nga adunay 17 puntos ug Jaybee Mantilla sa iyang 14 puntos.

Ang liga nahimo  pinaagi sa paningkamot ni Bulacao Brgy. Capt. Raul Cabanero, inabagan nila ni konsehal Banjo Abastillas, Darwin Cabanero, Agnes Lastimosa.

Kining maong  liga nga ubos sa bendisyon sa CESAFI pinaagi ni commissioner Felix ‘Boy’ Tiukinhoy  Jr.,  gipadagan ni  CESAFI deputy commissioner  Danny Duran ug head technical referee Edwin Dejacto Sr.

PUNTOS MATAG USA

Unang duwa:

CIT-U (82) – Muñez 12, Dela Cerna 11, Quijano 11, Lucena 9, Mumar 9, Sable 9, Bucao 8. Ariar 5, Sanchez 5, Berezo 4. USPF (81) – Batac 20, Managor 18, Patalinghug 11, Cabahug 11, Quiachon 7, Avancena 6, Bajamunde 6, Cauba 4, Alocillo 2.

Ikaduhang duwa:

uv (92) – balabag 29, Segumpan 19, Soliva 15, Maestre 8, Napao 6, Gahi 6, Suerte 3, Macion 3, Saga 3. USJ-R (87) – Dinolan 18, Gastador 17, Mantilla 14, Peromingan 8, Catiloc 7, Ewenike 7, Nuñez 6,  Bayhonan 4, Pastias 2, Kong 2. (BANAT NEWS)