Krusyal nga duwa atubangon sa upat ka teams
CEBU, Philippines - Krusyal nga duwa ang atubangon karon sa upat ka koponan nga pulos mangambisyon og daog sa naghinapos na nga elimination round sa PBA Philippine Cup didto sa Cuneta Astrodome.
Ang TNT KaTropa ug Phoenix Fuel Masters laraw nga mopalig-on sa ilang kupot sa luna sa playoffs sa ilang pakigsangka sa Mahindra Floodbuster ug sa NLEX Road Warriors nga pareho sab naglaraw nga mohaw-as sa lisud nga kahimtang aron malikayan ang sayo nilang pagkatagak.
Ang duwa sa KaTropa ug sa Floodbuster sa alas-4:15 sa hapon, sundan sa duwa tali sa Fuel Masters ug Road Warriors sa alas-7 sa gabii.
Sa pagka karon, ang TNT ug Phoenix uban sa Barangay Ginebra, Alaska Aces ug Star Hotshots nagtabla sa ikalima ngadto sa ikasiyam nga dapit sa standing sa managsama nilang 4-4 nga baraha.
Human mapilde sa Star niadtong miaging semana, ang TNT gusto mohingpit na nilang makuha ang luna sa quarterfinals pinaagi sa pagbuntog sa Mahindra nga maisip karon nga delikadong koponan tungod kay gikan pa kini sa duha ka sunod-sunod nga daog.
Si TNT coach Nash Racela mihangyo sa iyang mga key players nga sila si Troy Rosario, Jayson Castro ug Kelly Williams nga moyagyag sa tanan nilang abilidad aron mapukan ang Mahindra. Wala pa sila makaseguro kun makaduwa ba ang ilang star forward nga si Ranidel De Ocampo tungod sa injury sa tiil.
Sa ilang bahin, ang Fuel Masters desidido sab nga motagak sa Road Warriors aron makuha na ang labing unang playoff appearance sa ilang koponan sa PBA.
Ang NLEX ni coach Yeng Guiao positibo usab nga modaog sila batok sa Phoenix ug malugwayan pa ang ilang tsansa sa playoffs. (BANAT NEWS)
- Latest
