Kulbahinam nga MMA bouts sa 'No Way Out'

CEBU, Philippines - Subling makasaksi ang mga Cebuano mixed martial arts fans og kulbahinam nga aksiyon sa ikaduhang edisyon sa Cebu Extreme Fight League nga giulohan og ‘No Way Out’ sa Pebrero 18 didto sa Cebu Coliseum.

Human sa kapin duha ka tuig nga pagpahuway, ang YawYan ArDigma Martial Arts Federation Inc. ni Master Benigno 'Ekin' R. Caniga Jr. mibalik og organize og MMA fight card nga seguradong molingaw sa mga mahiligon sa combat sports.

Mupuno sa kahinam sa mga fans mao ang paggamit sa 'steel cage' inay ang tradisyonal nga ring.  “It took me couple of years before I can do another MMA event here in Cebu and now that I have returned to the scene, I am making sure that it will be more exciting and the cage is one of the big improvements I made,” matud pa ni Master Ekin.

“When we talked about MMA, the first thing fans think is a cage as what they are seeing in the UFC or ONE FC. Naningkamot gyud ko nga aduna tay cage nga magamit so that we can guarantee a more thrilling fight card,” dugang pa niya.

Bisan pa og usa lang kini ka amateur MMA card, si Master Ekin misaad usab nga salmutan kini sa mga masaarong fighters nga magagikan sa nagkadaiyang dapit sa nasud.

“Different from the first edition, this fight card doesn’t only include Cebuano fighters. Moapil dinhi ang mga best amateur strikers ug grapplers gikan sa Luzon, Visayas ug Mindanao," segun pa niya.

Wala pa mapinalisar ang tibuok fight card apan gilakip na ang tulo sa mga top prospects sa Sugbo nga mao sila si Roel ‘Akiyama’ Rosauro sa Team YawYan ArDigma, former national team member Nino Rio Saoy sa Mactan Combat Sports ug Brazilian Jiu-jitsu international medalist Arnel Ylanan sa Project X.

Tungod kay usa lang kini ka amateur tournament, ang mga fighters moduwa og four-minute matag rounds mas mubo sa five-minute per round nga gigamit sa professional fights.

Mga weight classes nga tigian mao ang strawweight (115 lbs.), flyweight (125 lbs.), bantamweight (135 lbss.) featherweight (145 lbss.) ug lightweight (155 lbs.) (BANAT NEWS)