Iesieken sud na’s semis
CEBU, Philippines - Giseguro gyud sa team Iesieken nga modaog batok sa JW Game Farm, 75-70 aron mogawas nga no. 1 pagtapos sa elimination round sa Triple-A Christmas League 2016 kagahapon didto sa Kimwa gym sa Barangay Subangdaku, dakbayan sa Mandaue.
Sa sayo pa, ang Monterroyo midaog pinaagi sa “default’ batok sa Larrobis.
Ang Iesieken awtomatik na nga miabante sa semifinals uban sa no. 2 nga D’ Lurics Enterprises.
Init kaayo ang kombinasyon nilang Robert Cuerbo, Loloh Sicad ug Orly Navarro diin nagtampohay sila og 12 puntos aron pangulohan ang balanseng ataki sa Iesieken nga mitapos sa eliminasyon bitbit ang 5-1 nga baraha.
Ang daog mahulog usab nga regalo ngadto sa anak sa ilang team manager Dandy Tagalog nga si Rogel Gabriel Khen ‘Gab’ Tagalog, kinsa magsaulog sa unang tuig sa iyang adlaw’ng natawhan karong adlawa.
Si Tagalog miamot og 10 puntos alang sa iyang koponan nga milansang og 49-32 sa halftime.
Nahulga ang Iesieken sa tunga-tungang bahin sa fourth quarter dihang mihiyos ilang labaw ngadto na lang sa tres puntos, 66-63 human mi-rally ang JW Game Farm. Apan salamat ni Navarro, kinsa mipasud sa iyang 3-pointer aron moburot og balik ang ilang labaw, 69-63. Si Mai Suson mipuno og dos puntos alang sa komportabli nilang labaw, 71-65 sa katapusang tres minutos sa duwa.
Si Roxan Razon mipabuto og 22 puntos aron pangulohan ang JW Game Farm. Gisundan ni Noel Dicdican sa iyang 18 puntos, lakip na ang upat ka tres ug Jojo Bodo nga adunay 17 puntos.
Sa laing bahin, si Adrian Gogo Jr. maoy mikiat og maayo diin miiskor siya og 18 puntos alang sa Allied nga milubong sa Salt City, 94-66.
Ang presidente sa Triple-A nga si Gilbert Lesin miamot og 17 puntos, samtang sila si Mendoza ug Jhonnel Escober mitampo’g 16 ug 14 puntos.
Sila lang si Johnrey Gorgonio ug Toycar Cardoza ang miiskor og double figures sa Salt City. Si Gorgonio mihimo og game-high 37 puntos, samtang si Cardoza mitali sab sa labing daku niyang iskor nga 14 puntos.
Human sa 29-23 nga bentaha sa first period, ang Allied padayon nga nanglimbasog hangtod nga miposte og 82-50 sa sayong bahin sa fourth quarter nga maoy labing daku nilang labaw nga natala.
Ang Allied nga maoy no. 3 makigharong sa no. 6 JW Game Farm, samtang ang no. 4 Salt City makigsangka sa no. 5 Monterroyo sa quarterfinals.
Ang modaog tali sa Allied ug JW Game Farm moabante sa semis diin ilang sangkaon ang no. 2 nga D’ Lurics Enterprises, samtang ang modaog sa Salt City ug Monterroyo maoy moharong sa no. 1 nga Iesieken.
Puntos matag usa
Unang duwa:
ALLIED (94) – Gogo 18, Lesin 17, Mendoza 16, Escober 14, Recto 8, Ygoña 8, Retiza 6, Budiongan 5, Soco 2.
SALT CITY (66) – Gorgonio 37, Cardoza 14, Cabucos 8, Armamento 4, Lugas 2, Montalban 2.
Ikaduhang duwa:
IESIEKEN (75) – Cuerbo 12, Sicad 12, Navarro 12, Tagalog 10, Mahusay 8, Arche 6, Suson 6, Grafe 4, Yatan 2, Lumen 2, Yares 2.
JW GAMEFARM (70) – Razon 22, Dicdican 18, Bodo 17, Nova 5, Monterde 4, Martillan 2, Almario 2. (BANAT NEWS)
- Latest
