Melindo Barawon ni Sakkreein
CEBU, Philippines - Seryoso si Thai fighter Fahlan Sakkreerin Jr. (31-4, 16KOs) nga mobaraw sa damgo ni Milan ‘El Metodico’ Melindo (34-2, 12KOs) nga moaway og kalibotanong bakus sa ilang sangka sa interim IBF light flyweight title sa main event sa “Pinoy Pride 39: Road to Redemption” fight card karong Sabado sa gabii diha sa Cebu Coliseum.
Lab-as pa gikan sa iyang fourth round TKO nga kadaugan batok ni Indonesian Stevanus Nana Bau niadtong Hunyo 6 didto sa Chiang Mai, Thailand aron pagsakmit sa IBF Pan belt, si Sakkreerin mibahad nga sunod niyang biktimahon si Melindo.
“We had the best training camp for this fight,” matud pa sa British trainer ni Sakkreerin nga si Rian Peter Munton atol sa press conference kagahapon didto sa St. Mark’s Hotel.“He (Sakkreerin) knows that this is the biggest fight of his career and he will be facing a good boxer in Milan. But this is a fight that we can win.”
Miangkon hinuon si Munton nga lapad og kasinatian si Melindo itandi sa iyang batos, apan nakapabor si Sakkreerin tungod kay mas presko pa kini sukwahi ni Melindo nga midawat na og taas nga kastigo sa lawas.
“Milan’s experience has a good and a bad side. He already fought world champions but Sakkreerin is the fresher boxer.”
Si Sakkreerin aduna sa’y taas nga knockout percentage nga 44 % , labaw og 11 ngadto ni Melindo.
Mipadayag og taas nga kompiyansa ang bisitang Thai boxer nga salig sa iyang katakus ug matud pa dili siya apektado sa hometown advantage ni Melindo.
Kini ang ikaduhang higayon ni Sakkreerin nga moaway alang sa world title human napakyas pagsakmit sa IBF minimumweight title batok ni Japanese Katsunari Takayama sa miaging tuig diin siya napilde pinaagi sa technical decision. (BANAT NEWS)
- Latest
