UV hari sa SBP, pakyas sa Passerelle
CEBU, Philippines - Managlahing kapalaran ang nadangatan sa University of the Visayas (UV) atol sa Visayas Regional Finals sa 2016 SBP Passerelle Tournament nga gipaluyohan sa Milo niadtong Domingo didto sa Capiz gymnasium sa Roxas City.
Ang UV mipatigbabaw sa University of St. La Salle-Bacolod, 47-46 aron pagsakmit sa kampiyonato sa SBP division, apan naka-silver lamang sila sa Passerelle human miyukbo ngadto sa Bacolod Tay Tung High School, 52-56.
Diriyot mikolapso ang UV human milabaw og 13 puntos hinungdan nga nakasikit ang USLS, 25-31, human sa tulo ka kuwarter. Nakatabla pa gani ang mga Bacoleño, ang katapusan sa iskor nga 39-39 gumikan kay sila si Franco Gabunada ug Mike Monton milusad og 6-0 aron pagpaginhawa og lawom sa UV, 45-39 sa nahabilin nga 1:06 sa duwa.
Mipaduol sa katapusang higayon ang USLS sa iskor nga 47-46 human sa tres ni Emmanuel Ortiz sa nahabilin nga 20 segundos, apan nakabsan sila sa oras.
Si Monton maoy nangu sa UV uban sa iyang 20 puntos, samtang si Gabunada miamot og otso puntos.
Sa Passerelle, ang UV ug Taytung sikit sab kaayo ang engkuwentro. Kanunay nga naggukod, ang UV nakasikit sa katapusang higayon sa iskor nga 52-54 gumikan kay si Joseph Palaganas mipasud sa iyang lay-up aron silyohan ang kadaugan sa Tay Tung sa nahabilin nga 17 segundos.
Gumikan sa ilang kalampusan, ang UV SBP team ug ang Tay Tung Passerelle maoy morepresentar sa Visayas sa national finals nga gikatakda karong Disyembre 3-4 didto sa Bacolod. (BANAT NEWS)
- Latest
