Teague miagak sa Pacers

CEBU, Philippines - Si Jeff Teague miratsada og 30 puntos, walo niini sa overtime, aron pag-aswat sa Indiana Pacers ngadto sa 115-111 nga kadaugan batok sa Oklahoma City Thunder sa NBA kagahapon   didto sa Chesapeake Energy Center.

Napakgang sa Pacers ang pagkamabayanihon ni Russell Westbrook nga mipahaguros og 31 puntos, 15 ka assists ug 11 ka rebounds, apil na ang iyang tres sa nahabilin  nga dos segundos sa regulasyon nga maoy nagduso sa duwa ngadto sa overtime sa iskor nga 103-103.

Apan si Teague milansang sab og tres dayon mikumpleto sa iyang 3-point play ug mipasud og duha ka free throws aron pagsalbar sa Pacers nga nagbitbit na karon og 7-7 nga baraha.

Miabag ni Teague si Thaddeus Young nga dunay 20 puntos ug 11 ka rebounds, samtang lain pang upat ang naka- double figures sa madaugon nilang kawsa.

Sa laing aksiyon, si Jimmy Butler mipatuasik og 40 puntos sa dihang gipayaka sa Chicago Bulls ang Los Angeles Lakers, 118-110.

Didto sa New York, ang Knicks mipakaging sa Atlanta Hawks, 104-94, samtang ang Portland TrailBlazers mipiog sa Brooklyn Nets, 129-109.

Nangu sa Knicks sila si Carmelo Anthony ug Kristaps Porzingis nga nagkumboya og 50 puntos alang sa ikaunom nilang daog sa 13 ka duwa.

Sila si Derrick Rose ug Courtney Lee mitampo og 14 puntos matag usa.

Sa habig sa Trail Blazers, si C.J. McCollum miwadwad og 33 puntos aron pakgangon ang tulo ka sagunson nilang pilde. (BANAT NEWS)