Aguelo modepensa na
CEBU, Philippines - Ang garbo sa mga Maasinhon nga si Adones Aguelo (26-14-2, 18KOs) modepensa sa iyang bakus isip Asian Boxing Federation super featherweight champion batok sa Sugbuanong challenger nga si Rodel Wenceslao (11-12-1, 4KOs) gikan sa dakbayan sa Mandaue atubangan sa iyang mga katagilungsod karong gabii didto sa Maasin City Sports Complex sa Southern Leyte.
Mao kini ang ikatulong pagdepensa ni Aguelo sa ABF title nga iyang nasakmit human gipatikangkang sa ikawalong hugna si Bonnie Makiling niadtong Septiyembre 20, 2014 didto sa Talisay City Sports Complex.
Ang 28-anyos nga si Aguelo gikan sa duha ka sunod-sunod nga daog pinaagi sa knockout batok nilang Bryan Samson ug Richard Betos, samtang si Wenceslao, ang kasamtangang PBF super lightweight champion, napilde pinaagi sa desisyon ni Adones Cabalquinto sa miagi niyang away niadtong Hunyo 4 didto sa Almendras Gym sa Davao City.
Sa supporting bouts sa maong binukbukay nga gipasiugdahan sa Maasin City LGU ubos sa liderato ni Mayor Maloney L. Samaco, nga usa sab ka tiunay nga deboto og boksing, sila si featherweight Anthony Sabalde sa Cebu City ug super flyweight Elias Joaquino sa Siargao, Surigao del Norte makigharong batok sa Boholanong mga kontra nga sila si Anthony Galigao ug Tantan Recablanca. (BANAT NEWS)
- Latest
