New Millennium Hardware, Butch surveying midemolis sa ilang mga kontra sa LABA

CEBU, Philippines - Pwerteng inita sa duwa sa New Millennium Hardware ug  sa Butch Surveying diin ilang   gilubong og tagaliog ang tagsa-tagsa nilang kaatbang sa LABA President’s Cup 2016 Second Conference basketball tournament niadtong Biyernes sa gabii didto sa Barangay Banilad gym, dakbayan sa Mandaue.

Ang New Millennium Hardware wa’y puangod nga  nimasaker sa Explorer sa iskor nga 104-71, samtang ang Butch Surveying wala sa’y kukaluoy nga  midemolis sa The Realtors, 129-82.

Si LABA president Gilbert Sebandal  grabe kaayo nga nakaduwa diin mikadlit  siya og 18 puntos aron pangulohan ang New Millennium Hardware ni team owner Gil Gollon nga miokupar sa ikaduhang dapit sa standing bitbit ang 6-2 nga baraha ug  abante na sa sunod nga hugna.

Si Sebandal mao sab ang nakabingat og maayo sa labaw sa  New Millennium Hardware, 92-63  atol sa tunga-tungang bahin sa fourth quarter human sa iyang ‘back-to-back’  3-pointers ug ingon man  lay-up.

Misalida sab si Tawing Grafe aron moamot og 13 puntos, samtang sila si  Bernard Rogado, Eman Pacquiao ug Cris Ubas miambit  og  12  puntos matag usa sa New Millennium Hardware,   kansang   duwa    wala gyud mobahar gikan sa pagsugod hangtod sa katapusang gutlo.

Upat sab ka magduduwa sa Explorer ang miiskor og double digits pinangulohan ni Pedro Villarosa sa iyang 15 puntos. Sila si Al Yamomo, Cito Enriquez ug Arnel Lepon nagtampohay og 10 puntos sa naparot nga Explorer ni Allan Buenavista.

Sa laing bahin, si Ronald Llanos mihimo’g double-double uban ang 21 puntos ug 14 ka rebounds aron mangu sa Butch Surveying ni team owner Butch Migriño nga miarangkada dayon pagsugod aron moposte og 63-49 nga bentaha sa halftime. Miburot pa ang labaw ngadto sa 105-68 nga nakapasihag og maayo sa kadaugan sa Butch Surveying ubos sa giya ni coach Rudy Candaleda nga nakaangkon og dobleng daog  human sab niya timoni ang kadaugan sa New Millennium Hardware.

Si Dongkoy Catinoy miamot og 14 puntos, samtang si Geryl Bukiron miambit og 12 puntos.

Mahug nga wa’y kapuslanan ang 30 puntos ug 10 ka rebounds ni Barak Recto kay ang  Realtors wala pa gihapon  katilaw og daog sud sa walo ka duwa ning maong torneyo nga gipadagan ni commissioner Albert ‘Obeth’ Ramos inabagan nilang Lloyd Chavez, Adie Cinco ug Willy Medillo.

PUNTOS MATAG USA

Unang duwa:

NEW MILLENNIUM Hardware (104) – Sebandal 18, Grafe 13, Rogado 12, Pacquiao 12, Ubas 12, Asis 8, Ocier 6, Canjo 4, Cinco 4, Chavez 4, Ornopia 4, Incorporado 2, Ranile 2.

EXPLORER (71) – Villarosa 15, Yamomo 10, Enriquez 10, Lepon 10, Comendador 8, Buliag 6, Enad 3, Buenavista 3, Melana 2, Ancot 2, Yatan 2.

Ikaduhang duwa:

BUTCH Surveying (129) –  Llanos 21, Catinoy 14, Bukiron 12, Adolfo 11, Gelbolingo 8, Magale 8, Hatamosa 8, Lagaras 8, Abarquez 8, Ramirez 8, Medillo 6, Anghay 6.

AFN Realtors (82) – Recto 30, Tupaz 16, Auman 10, Limosnero 10, Cena 7, Mingane 7, Tantuan 2.