Lady Warriors diretso sa semifinals
MANILA, Philippines - Nasawata ng Open Conference titlist na Pocari Sweat ang matikas na ratsada ng Laoag sa huling sandali ng laro patungo sa 25-13, 25-20, 26-24 panalo upang masungkit ang ikalawang tiket sa semifinals kagabi sa Shakey’s V-League Season 13 Reinforced Conference sa Philsports Arena sa Pasig City.
Humataw nang husto si American import Breanna Lee Mackie na kumolekta ng 21 puntos mula sa 16 attacks, 3 blocks at 2 aces para dalhin ang Lady Warriors sa ikaapat na sunod na panalo sa limang laro.
Nagdagdag naman ng pitong puntos si American middle hitter Andrea Kacsits, habang may anim si Elaine Kasilag at tig-lima sina Open Conference Finals MVP Myla Pablo at middle blocker Desiree Dadang.
Sinamahan ng Pocari sa Final Four ang University of Santo Tomas na may hawak na 5-1 marka.
Nahulog sa 2-4 baraha ang Power Smashers matapos malimitahan sa 10 puntos si two-time NCAA MVP Grethcel Soltones at siyam na puntos si National University standout Jorelle Singh.
May tsansa sana ang Laoag na paabutin ang laro sa fourth set nang hawakan ang 24-19 kalamangan sa third set.
Sa ikalawang laro, tinalo ng University of the Philippines ang Air Force, 25-16, 25-20, 25-10, para tumapos na may 3-4 baraha.
May 2-4 marka ang Air Force.
- Latest
