Casili naka-Grandslam

CEBU, Philippines - Si Cyril Sabellana migilak og maayo sa dihang gidominar sa Casili ang Tugbongan, 67-56 aron pagkulit og makasaysayanong grandslam sa SK juniors category A sa 6th Mayor Teresa P. Alegado Fiesta Basketball League didto sa Consolacion, Cebu.

Ang top gunner sa Casili nga si Sabellana daw sa gibayaw pud sa himaya gumikan kay sa ikatulo sab nga sunod-sunod nga tuig iyang gipakyaw ang Finals ug regular season MVP awards.  Mitapos siya og 18 puntos. Sila  si  Rey  Gonzaga  Jr. ug Dwight Gonzaga nagkumboya’g 23 puntos sa Casili nga wala na mopaginhawa pa sa Tugbongan human moposte’g 20-11 nga labaw.

Human gitak-op sa Casili ang first half nga abante sa iskor nga 39-27, ilang gitiwasan ang Tugbongan sa ikatulong kuwarter aron pag-inat sa ilang labaw ngadto na sa 21 puntos, 57-36.

Si Jerson Tumongha miratsada og 23 puntos sa Tugbongan, apan wala siya makaangkon og igong suporta gikan sa iyang mga teammates.

Ang mga duwa ubos sa superbisyon ni commissioner Paul Alelu Q. Flores, kanhi batos sa FEU Tamaraws uban ni PBA superstar Arwind Santos nga nakampiyon sa UAAP Season 68 niadtong tuig 2008. Miabag kaniya si deputy commissioner Aurelio Eslawan.

Ang overall committee chairman sa maong usa ka bulan nga kalihukan mao si Liga ng mga Barangay President Roy Linaboc. Nagsilbe niyang co-chairman mao sila si SB members Marilou P. Casul ug Benjamin ‘Boy’ Tibon.

Hugtanon sab kining gipaluyohan sa Consolacion LGU ubos sa pagpangu ni Mayor Teresa Alegado ug Vice Mayor Dr. Rey Damole uban nilang SB members JoyJoy Alegado, Nelia Ermac, Elenito Palang, Brando Cuizon, Victor Maglasang ug Alfie Ouano. (BANAT NEWS)