Tabal mopasiugda’g ‘chairs of Joy run’
CEBU, Philippines - Isip paagi aron makatigum og salapi aron itabang sa iyang kanhi tunghaan nga Guba Elementary School, ang Cebuana Olympian nga si Mary Joy Tabal mopasiugda sa “Chairs of Joy Run” sa Oktubre 1 diha sa Capitol grounds.
Ang lumba adunay 10K ug 5K categories ug bahinon sa age-group divisions.
Uban sa tabang sa Motor Ace-Kawasaki Racing, ang marathoner nga si Tabal misugyot sa pagpahigayon sa usa ka charity race aron usab makatigom sila og salapi alang sa giambisyon nilang 400 ka armchairs alang sa Guba Elementary School.
Sa wala pa siya milarga paingon sa Brazil alang sa Rio Olympics, si Tabal mihangyo na sa Rotary Club of Cebu pinaagi ni Bernard Vonn Sia aron iapil ang Guba sa ilang school chairs program.
Ang Rotary Club of Cebu misaad og 100 ka armchairs, apan ila kini nga gidobli ngadto na sa 200.
“Pinangga gyud na niya ang Guba. So we made an ocular inspection and on the day of the Olympic marathon, I committed to 100 armchairs and additional 100 as an advance to a pledge we made to Joy that is what we will be delivering on Saturday (Sept.3),” matud pa ni Sia.
Sa dihang nasayran ang maong plano, si Motor Ace Phils. president Jonel Borromeo walay duha-duhang miingon nga iyang parihasan ang kantidad sa kuwarta nga makita ni Tabal gikan sa fun run.
Ang registration fee nagkantidad og P350. Mahimong magparehistro didto sa RUNNR sa Ayala Active Zone, SM City Cebu ug Cebu City Sports Center. (BANAT PALARO)
- Latest
