Magdaleno nagpanikad na nga moaway ni Donaire
CEBU, Philippines - Ang wala pa’y pildeng Mehikanong si Jessie Magdaleno nagpanikad na nga moaway ni WBO super bantamweight champion Nonito Donaire Jr.
Segun sa taho ni Gilbert Manzano sa Las Vegas Review-Journal, si Magdaleno (23-0, 17KOs) mikompirma nga duna na’y nahitabong negosasyon tali sa ilang kampo aron ipinalisar ang maong away nga dugay na niyang gipaabot.
“It’s finally going to happen, I’ve been waiting on Donaire for almost a year now and finally things are falling into place,” matud pa sa 24-anyos nga si Magdaleno, nga maoy mandatory challenger ni Donaire.
Si Top Rank chairman Bob Arum nagkanayon sa miaging adlaw nga si Donaire lagmit modepensa sa iyang titulo batok ni Magdaleno isip co-main event sa comeback fight ni Manny Pacquiao batok ni Jessie Vargas karong Nobiyembre 5 didto sa Thomas and Mack Center sa Las Vegas, Nevada.
Kun ugaling mahitsas na ang tanan, ang duha ka labing bug-at nga pangan karon sa Philippine boxing moaway sa susamang card sa labing unang higayon. Seguradong makadugang kini og lamas sa maong promosyon ilabi na kay ang ilang mga kontra pareho nga nakabasi sa Las Vegas.
Gani gibansagan ni Magdaleno ang umaabot nilang salida nga “Philippines vs. Las Vegas”.
“I was just talking about that the other day with my coach, how cool would that be if two Vegas fighters face two Filipinos, and we both win titles,” dason pa ni Magdaleno. (BANAT PALARO)
- Latest
