Tabal andam makig-alayon sa PATAFA
CEBU, Philippines - Ang Sugbuanang marathoner nga si Mary Joy Tabal ug ang Motor Ace Racing Team nga mitabang pag-agak sa iyang karera andam nga mosunod sa mga kondisyones sa Philippine Amateur Track and Field Association (PATAFA) sa tinguha nga makarepresentar siya sa Pilipinas sa Rio Olympics duha ka bulan gikan karon didto sa Rio de Janiero, Brazil.
Nakuha ni Tabal ang Olympic qualifying standard nga 2:45 human siya mirehistro og duha ka oras, 43 minutos ug 29 segundos sa Scotiabank Ottawa Marathon sa miaging semana didto sa Canada diin siya mitapos nga ikawalo sa 1,455 ka mga babayeng runners.
Ang maong dungog wala hinuon maghatag ni Tabal og awtomatik nga luna sa Rio kay kinahanglan pa man siyang mosunod sa proseso nga gilatid sa Philippine Olympic Committee ug PATAFA alang sa usa ka atleta aron makarepresentar kini sa nasud sa Olympics.
Gumikan kay dili na siya miyembro sa national team human sa iyang pagluwat niadtong Septiyembre sa miaging tuig, si Tabal kinahanglan una nga mopadala og suwat ngadto sa PATAFA pagpadayag sa iyang interes nga mobalik siya sa Phl team, butang nga andam tumanon sa iyang koponan.
Si Joel Borromeo sa Motor Ace Racing, ang manedyer ug chief corporate backer ni Tabal, nagkanayon nga dili sila mangita og laing dalan sa ilang misyon nga makalarga sa Rio kay basin mosamot hinuon ka komplikado ang sitwasyon.
“We have agreed to go through the procedure. We will request for her reinstatement because it is necessary for her to be recognized as a national team member,” matud pa ni Borromeo atol sa usa ka victory party nga ilang gidalit alang ni Tabal didto sa Casino Español de Cebu sa miaging gabii.
Matud pa ni Borromeo nga nakahibawo sila sa maong proseso ning bag-o lang gumikan kay nag-agad man sila tanan ni coach Philip Duenas kabahin sa mga lagda ug uban pang pamalakad kabahin sa maong butang. Miangkon siya nga ilang nataligam-an ang bahin sa PATAFA sa pagtuo nga ang POC ra maoy bugtong makaendorso og mga atleta ngadto sa Olympics.
Sa iyang bahin, si Tabal nagkanayon nga wala siya magmahay nga mibiya sa Phl team, apan andam siyang makig-alayon sa PATAFA alang sa kaayohan sa sports. (BANAT NEWS)
- Latest
