PBA Rookie Draft apektado sa pagbuhay sa Gilas cadet program

MANILA, Philippines – Ang pagbuhay sa Gilas Pilipinas cadet program ang magpapahina sa darating na 2016 PBA Rookie Draft ngunit makakatulong naman sa pro league sa kabuuan.

Sinabi ni incoming Samahang Basketbol ng Pilipinas president Al Panlilio na kailangang magbigay para sa programa ng SBP.

“It’s a common problem across the globe brought about by the new FIBA calendar. We thought at the SBP that the best way to solve the problem is to create a cadet team focused entirely to train and participate in the international tourneys,” sabi ni Panlilio.

“We have no real choice,” dagdag pa nito ukol sa bagong FIBA setup na ang home-and-away games ay direktang tatama sa iskedyul ng local pro league.

Kumpiyansa ang Meralco senior vice president na kumakatawan sa kumpanya sa PBA board na makakakuha ng suporta ang plano ng SBP.

“I’m in talks with (PBA commissioner) Chito (Narvasa). I will sit down with him to share with him the SBP plan,” wika ni Panlilio.

Dati nang pinapalagan ng PBA board ang tinatawag nilang “pick-up system” mula sa PBA ranks.

Sinabi na rin nina dating PBA commissioner Chito Salud at kasalukuyang PBA board chairman Robert Non na maaaring isakripisyo ng liga ang PBA draft para makabuo ang SBP ng training pool sa hanay ng mga amateurs.

Sa dulo ang nasabing mga players ay maglalaro rin sa PBA.

“The PBA will benefit as the league will get quality players in the end. This was the case with the original Gilas team,” sabi pa ni Panlilio.

Sina Greg Slaughter, Japeth Aguilar, Rabeh Al-Hussaini, Jvee Casio, Mark Barroca, Marcio Lassiter, Chris Lutz, Chris Tiu at Mac Baracael ay mga dating blue-chip prospects bago sumalang sa PBA draft.

Ang mga planong isama sa bagong cadet pool ay sina Kiefer Ravena, Mac Belo, Kevin Ferrer, Roger Pogoy, Cris Mike Tolomia, Jiovani Jalalon at Von Pessumal.