Phinma/SWU sud na’s Partner’s Cup semis

CEBU, Philippines - Si All-Star guard Mark Jayven Tallo milansang og 12 sa iyang 18 puntos sa katapusang kuwarter sa dihang gilat-an sa Phinma/Southwestern University Cobras ang My Led Opto/Cebu Institute of Technology-University Wildcats, 74-47  aron pagpabilin sa ikaduhang puwesto sa 8th Cebu Schools Athletic Foundation, Inc. (CESAFI) Partner’s Cup kagabii didto sa Cebu Coliseum.

Si Tallo nga milangkat sab og siyam ka rebounds, gipaluyohan ni Giovannie Luz uban sa iyang 16 puntos, lima ka rebounds ug upat ka assists sa Cobras nga hingpit nang nakaangkon og luna sa semifinals bitbit ang 4-1 win-loss record.

Igo lamang nakasikit ang Wildcats sa iskor nga 15-19 gumikan kay gipabuthan kini sa Cobras og 11-2 run aron pagposte og 30-17 nga labaw sa halftime.

Ang duha ka sunod-sunod nga basket nilang Giovannie Luz ug Mark Racho pagsugod sa final half nakapainat sa labaw sa Phinma ngadto na sa 17 puntos.

Sukad niadto, salida na tanan sa Cobras nga nimintinar og dili momenos sa 20 puntos nga labaw sa naghinapos nga bahin sa duwa. Ang 8-0 run sa ilang mga second stringers nakatunol sa kinadak-an nilang labaw nga 28 puntos sa iskor nga 72-44, sa nahabilin nga 1:03 sa final period.

Walay player nga nakamugna og double figures sa Wildcats nga nanamilit na sa torneyo nga igo lang nakatangag og usa ka daog sud sa unom ka duwa. (BANAT NEWS)