Lahat nakatutok sa Navy-Standard Insurance

ILOILO CITY, Philippines --Pipilitin nina Ronald Oranza at Rudy Roque ng Navy-Standard Insurance na mapatibay ang kapit sa kanilang overall lead sa pagpadyak ng Visayas Leg ng LBC Ronda Pilipinas 2016 sa pamamagitan ng 121.50-kilometer Stage Three ngayon na magsisimula sa Iloilo Business Park at matatapos sa Robinson’s Mall sa Roxas City.

Inangkin nina Oranza at Roque ang unang dalawang stages matapos pagharian ng una ang Stage One criterium sa Bago City, Negros Occidental noong BIyernes at nagbida naman ang huli sa Stage Two criterium noong Lunes para magsosyo sa general classification lead sa magkatulad nilang 28 points.

Patuloy na isusuot ni Oranza, pumangalawa kay Roque sa Stage Two, ang LBC red jersey matapos magsumite ng mas mabilis na tiyempong 2 oras, 16 minuto at 50.69 segundo kumpara sa 2:16:50.77 ni Roque na pumangalawa sa Stage One.

Ang isang stage win ay katumbas ng 15 points, habang ang second place finisher ay may 13 points.