Spurs mitiklo sa Bulls

CEBU, Philippines - Mikadlit og 29 puntos si Kawhi Leonard, samtang si    LaMarcus Aldridge adunay 26 puntos uban sa 10 ka rebounds  dihang ang  San Antonio Spurs  pabiling walay pilde sa ilang korte sud sa 31 ka duwa human sa ilang 109-101 nga kadaugan batok  sa Chicago Bulls kagahapon didto sa AT&T Center sa San Antonio, Texas.

Ang beteranong si Tony Parker midugang og 20 puntos  uban sa iyang 12 ka assists alang sa Spurs, kansang home victories milanat na ngadto sa 40 ka sagunson nga daog lakip sa miaging season.

Ang Spurs mihimo sa ilang  best start human sa 65 ka duwa sa ilang 55-10 nga baraha.

Silang Derrick Rose ug Pau Gasol parehong mihakot  og 21 puntos alang sa Bulls, samtang  si E’Twaun Moore mitampo og 20 puntos.  

Ang Bulls nagduwa kagahapon nga wala silang Jimmy Butler, Joakim Noah ug Cameron Bairstow  tungod sa ilang piang. 

Si Leonard maoy nagdepensa ni Rose hinungdan nga daghan kaayong sipyat ang Bulls’ point guard, kinsa nakahimo’g 2 for 7 atol sa first quarter.

Si Rose mihimo'g 6 for  12 sa iyang field shooting  sa second half diin mi-iskor siya'g 13 puntos.

Sa maong duwa, ang Bulls nakahimo'g 21 ka turnovers.

Ang bag-ong gikuha   sa Spurs nga si Kevin Martin igo lang miiskor og usa ka palita sud sa otso minutos sulod sa korte. 

Sa laing mga duwa, midaog na sab ang Toronto Raptors didto sa ilang homecourt batok sa Atlanta Hawks, 104-96,   ang Denver Nuggets midaog sa Phoenix Suns, 116-98 ug   ang Cleveland Cavaliers midaog  sa  Los Angeles Lakers, 120-108. (BANAT NEWS)