June Mar kikilalanin sa PSA Awards

MANILA, Philippines – Pangungunahan ni super­star June Mar Fajar­do ng San Miguel Beer ang listahan ng mga major awardees sa Philippine Sportswriters Association (PSA) Annual Awards Night na gaganapin sa Pebrero 13 sa One Esplanade sa Pasay City.

Bibigyan ng parangal si Fajardo matapos sungkitin ang ikalawang sunod na Most Valuable Player award sa Philippine Basketball Association noong nakaraang taon.

Ito ang ikalawang PSA major award ng 6-foot-10 center.

Makakasama ni Fajardo sa listahan ng major awar­dees sina Rey Mark Belo ng Far Eastern University at Mark Cruz ng Colegio de San Juan de Letran.

Sina Belo at Cruz ang tinanghal na Finals MVP sa UAAP at NCAA, ayon sa pagkakasunod.

Pasok din sa listahan si­na Southeast Asian Games sprint double gold medalists Eric Shauwn Cray, pool teen sensation Chezka Centeno, cycling champion Santy Barnachea, pro golf Cyna Rod­riguez, amateur golf Prin­cess Mary Superal at rider Raniel Resuello gayundin sina wushu world championship gold medal winners Divine Wally at Arnel Mandal, jockey Jonathan Hernandez, at tennis players Katharina Lehnert at Alberto ‘AJ’ Lim Jr.

Nauna nang tinukoy si­na world boxing champions Nonito Donaire Jr. at Donnie Nietes, at Asian Tour winner Miguel Tabuena bilang Athletes of the Year.