SHS-ADC naka 'six-peat' sa NBTC

CEBU, Philippines - Sa ikaunom nga sunod-sunod nga tuig, ang Sacred Heart School-Ateneo de Cebu (SHS-AdC) maoy milangkat sa Cebu title sa SM NBTC League human gipakgang niini ang University of the Visayas (UV), 84-74 sa tagakay nga Game-3 sa ilang best-of-three finals series niadtong Domingo didto sa City Sports Club-Cebu gym.

Kulbahinam nga duwa ang gipabuhagay sa duha ka kampo sa nag-unang tulo ka kuwarter, apan kalit lang nanginit ang Magis Eagles nga milusad og 20-5 run aron pagposte og 17 puntos nga labaw, 80-63, sa nahabilin nga 1:26 sa duwa nga maoy nahimo nilang yawi sa kalampusan.

Si Renzo Calumpang, usa sa mga miduslit og kayo sa maong nagbagang rally human milansang og duha ka sunod-sunod nga 3-pointers. Sila si Errol Pastor, Andrew Velasco, Travis Mantua, Alex Visser ug Jeremy Nacua miabag sab sa balanseng opensa sa Magis Eagles nga maoy nakapabuak sa dughan sa Baby Lancers.

Si Calampang mitapos og 17 puntos, samtang sila si Velasco, Pastor ug Mantua nagkumboya og 39 puntos. Dugang kalipay ang gibati sa Magis Eagles ni coach Francis Auquico human si Pastor maoy gipasidunggang Most Outstanding Player.

Sa habig sa Baby Lancers, si Jancork Cabahug nga sakop sa Batang Gilas Under 18 national training pool, mitali og 22 puntos, apan pakyas na sab siya ning higayona pagtuboy sa iyang koponan ngadto sa gihandum nilang kadaugan.

Pangandaman karon sa Magis Eagles mao ang pagdepensa sa ilang korona sa SM NBTC National Finals didto sa Mall of Asia Arena sa kaulohan karong Marso 13-17. (BANAT PALARO)