Blue Lane kampiyon sa Aduana Legends

CEBU, Philippines – Nakapasulod sa iyang jumpshot ibabaw sa free throw line si Renato Agustinez sa nahibiling 10 segundos aron ituboy ang Blue Lane Brokers ngadto sa 59-57 nga kadaogan batok sa Petracorta Brokers kaniadtong Sabado sa knockout finals sa Aduana Legends basketball tournament didto sa barangay San Roque gym, ning dakbayan.

Sa sayo pa, naangkon sa PRM Brokers ang ikatulong pwesto human sila modaog batok sa Joycan Transport sa iskor, 55-46.

Kanunay naglabaw ang Blue Lane gikan sa sinugdanan pinaagi sa presensiya nilang Jing-jing Rama ug Boodie "Parker" Monteno ug nagsige sila'g labaw og double figures. Ang labing dakong biya sa first half miabot og 17 puntos, 34-17.

Nagsugod og rally ang Petracorta didto sa tunga-tungang bahin sa third period diin nabiyaan na lang sila og 12 puntos, 28-40 pinaagi sa mga baskets nilang Erlito Avenido, Inting Bacalla ug Amay Palad.

Hingpit nga nakumpleto sa Petracorta ang ilang rally human matabla ni Bacalla ang duwa sa 57-all sa kataposang 1:13 ang oras sa duwa. Samtang buot sa Petracorta nga mokulit og upset, nabiyaan si Agustinez ibabaw sa foul line nga maayong pagkadawat sa bola gikan sa assist ni Rama ug naka-ipsot sila sa posible untang overtime dihang misulod ang jumpshot ni Agustinez.

Ball possession pa unta gihapon sa Petracorta sa kataposang dos segundos apan wala mosulod ang duha ka free throws ni Tata  Amahit kinsa tataw kaayo nga ubos sa grabeng pressure ug naglumpayat sa kalipay ang mga sakop sa Blue Lane kinsa naka-eskapo ngadto sa dos puntos nga kadaogan.

Si Aladino Labana kinsa maoy nag-igo sa first quarter, maoy nangu sa Blue Lane sa iyang 14 puntos samtang may 11 puntos matag usa silang Monteno ug Gilbert Orilaneda kinsa maoy napiling Finals MVP.

Silang Avenido ug Palad maoy nangu sa Petracorta sa  ilang 15 ug 14 puntos matag usa ug laing 13 puntos gikan ni Ewin Nadal.

Sa sayo pa, mirakrak og 33 puntos si Loreto Castillo aron pangulohan ang PRM Brokers samtang midugang og 13 puntos si Digoy Solidarios.

Ang Joycan Transport gipangulohan ni Ferdie Sigue sa iyang 12 puntos apan siya lang ang nakahimo og double figures sa ilang team. Miamot og nuybe puntos si Jun Gayo ug may kuwatro puntos si Jerry Jaca.

Puntos matag usa:

First Game:

PRM Brokers (55) –   Castillo 33, Solidarios 13, Aragon 7, Librando 2.

Joycan Transport (46) – Sigue 12, Gayo 9, Solis 8, Canal 7, Jaca 4, Jumayan 4, Valle 2.

Second Game:

Blue Lane (59) –  Labana 14, Orilaneda 11, Monteno 11, Agustinez 5, Pastor 5, Lopez 4, Garcia 3, Rama 2, Carmen 2, Respecia 2, Resma 2.

Petracorta Brokers (57) – Avenido 15, Palad 14, Nadal 13, Bacalla 9, J, Petracorta 5, Empleo 2, Fuentes 2, Velez 1. Halftime: 34-17. Refs: R. Yumelo, C.Tejero, H. Fontanosa. K. Ochea. (BANAT NEWS)