2nd Cebu City Triathlon mosikad na

CEBU, Philippines – Moabot ngadto sa 200 ka mga atleta ang magsinukdanay sa ilang abilidad sa paglangoy, bisikleta ug dagan gumikan kay ang ikaduhang edisyon sa Cebu City Triathlon mosikad na sayo karong buntag diha sa Cebu City Sports Center.

Gawas ni defending champion Justin Chiongbian ug iyang igsuon nga si Yuan, angayang atngan sa maong spint distance race mao si Paul Jumalil, ang bag-ong talento nga napunta sa poder sa Rider Omega Pro.

Taas ang gihandum nga makab-ot ni Jumamil gumikan kay ang garbo sa mga Bol-anon gikan sa dakbayan sa Tagbilaran nanghawod man sa pipila ka mga karera sa miaging tuig. Gani sayo ning bulana, siya maoy midominar sa Altritude Off-Road Triathlon didto sa Bukidnon.

Sa women’s category, ang lig-ong mga contenders naglangkob nilang Aaliyah Mataragnon ug Cianyl Gonzalez.

Gawas sa elite division, duna sa’y age-groupers nga mopakita’g aksiyon apan kadto lamang mga elite ang makadawat og ganting salapi.

Si Steve Maniquis sa organizing Cornerstone Group nagkanayon nga ang usa ka entrante kinahanglan nga magparehistro ubos sa elite class aron siya kuwalipikadong modawat sa cash reward. (BANAT NEWS)