Hidalgo miarangkada dayon
CEBU, Philippines – Dili babag ni Francis Hidalgo ang pagduwa sa duha ka binyu human siya miposte og duha ka sunod-sunod nga daog sa managlahing kategoriya pagsugod sa 10th Cebuana Lhuillier Age Group Tennis Tournament-Cebu leg kagahapon.
Unang miduwa si Hidalgo didto sa Alta Vista Golf and Country Club diin niya giablihan ang iyang kampanya sa boys 16-under division pinaagi sa pagpilde ni Randy Labor, 6-2, 6-3.
Gikan sa Alta Vista, ang varsity player sa University of the Visayas (UV) nga si Hidalgo misulong didto sa Pardo Tennis Club diin siya milansang og laing daog human makaipsot batok ni Elmar Christian Lagat pinaagi sa super tie-break, 6-3, 4-6, 10-8, ning higayona sa boys 18-under class.
Dili hinuon angayan nga magmaya sa Hidalgo gumikan kay sangkaon man niya ang tadhang si Norman Joseph Enriquez sa sunod nga hugna sa boys 18-under. Si Enriquez ug ang Zamboangeño nga si Jose Maria Pague pulos midaog pinaagi sa forfeit sa una nilang duwa.
Samtang si topseed Jan Godfrey Seno ug ang Bol-anon nga si Russel Cero nakigduyog kanila sa sunod nga hugna. Si Seno yanong midaog batok ni Ralph Daryl Alcordo, 6-0, 6-3, samtang si Cero mipukan ni Dale Estonillo, 6-1, 6-2.
Sa 16-under age group didto sa Alta Vista, miduyog ni Hidalgo sa sunod nga hugna mao sila si Jude Carl Balundo, John Steven Sonsona, Francis Navales ug Ibarra Ortega, samtang sila si Duma Hakkim Boloto ug Clyde Mari Casino miabante sa third round.
Sa boys 14 didto sa CitiGreen Tennis Resort, nakasud sa second round mao sila si Eric John Longakit, Miguel Binghay, Harland Hogan, John Paul Borja ug Uzziel Keane Pepito. (BANAT NEWS)
- Latest
