Torre ibayaw sa Hall of Fame

CEBU, Philippines – Si chess Grandmaster Eugene Torre maoy nangu sa listahan sa pipila ka mga bayani sa paugnat sa kusog sa nasud nga gikatakdang ibayaw sa Philippine Sports Hall of Fame.

Sa iyang panahon, dakung dungog ug garbo ang natunol ni Torre sa iyang mga kababayan isip labing unang Asyano nga nakaangkon og GM title sa duwang ahedres. Siya sab ang nagtimon sa Pilipinas ngadto sa labing nindot niining nakab-ot nga ikawalong puwesto sa 1988 Thessaloniki Olympiad didto sa Greece.

Gawas ni Torre, tunolan sab sa maong talagsaon nga pasidungog ang lain pang Pinoy sports greats nga sila si Haydee Coloso Espino ug Jacinto Cayco (swimming), Mona Sulaiman (athletics), Ed Ocampo, Kurt Bachman ug Mariano Tolentino (basketball), ug Johnny Jose (tennis).

Makigduyog kanila ang Olympians nga sila si Miguel White, Simeon Toribio, Teofilo Yldefonso ug Carlos Loyzaga ug ang Philippine Team nga milangkat og bronseng medalya sa 1954 World Basketball hampionships didto sa Rio de Janeiro, Brazil.

Ang unang batch nga gibandila ngadto sa Hall Fame naglangkob sa mga banggiitang boksingero nga sila si anhing Gabriel ‘Flash’ Elorde, Francisco ‘Pancho Villa’ Guilledo, Ceferino Garcia, Jose ‘Cely’ Villanueva ug ang iyang anak nga si Anthony Villanueva. (BANAT NEWS)