Final leg sa Paz Razada cycling sa Enero 31
CEBU, Philippines – Ang ikapito ug katapusang leg sa 1st Mayor Paz Radaza Cycling Championships, nga orihinal untang gitakda niadtong Disyembre, himuon karong Enero 31 diha gihapon sa Hoops Dome sa Barangay Gun-ob, dakbayan sa Lapu-Lapu.
Si Andry Berame, usa sa mga organizers, nagkanayon nga ang maong criterium race eksklusibo lamang sa mga Oponganong seklista.
Human sa unom ka legs, si Xterra pro Joseph Miller maoy nag-una sa elite class bitbit ang 115 puntos. Labaw lamang siya og 15 puntos ni Rolly Cabaluna, samtang si Marchel Barcenal maoy nagdagan sa ikatulo dala ang 78 puntos.
Sa beginners class, si Raymart Tampus maoy temporaryo nag-una sa natala niining 135 puntos. Nagsunod kaniya mao sila si Donkey Sanchez ug Brian Lozano nga adunay 90 ug 60 puntos.
Ang beteranong si Haylin Bardaje maoy lider sa golden boys category human miposte og 115 puntos. Nagsunod sila si Ronald Taperla nga adunay 100 puntos ug Bonifacio Sumalinog nga dunay 92 puntos.
Sa mountainbike open, si Kent Inoc maoy nag-una bitbit ang 111 puntos. Sila si Reden Tampus ug Leonard Talimporos nagpatong sa ikaduha ug ikatulo sa ilang 63 ug 59 puntos. (BANAT NEWS)
- Latest
